Aizawl: Mizoram tlawhtu khualzin an pun chhoh zel rualin Mizo hmeichhiate himna ngaih pawimawh a tul hle tih sawiin, Social Welfare, Women & Child Development Minister Lalrinpuii chuan dan kengkawhtuten zirchianna zau zawk neiin Mizorama hotel leh homestay kalphungte enfiah a tul thu a sawi.
November 16, 2026-a Planning & Programme Implementation Department (RDB) Conference Hall-a National Commission for Women leh Mizoram State Commission for Women (MSCW) tangkawp buatsaih, ‘The Mizoram Prevention of Immoral Traffic Rules, 1996’ chungchang zirhonaah khuallian niin Minister Lalrinpuii chuan kum kaltaa khualzin nuai nga chuang Mizorama an luh leh kumina khualzin pung zelte hian ram tan hlawkna thlen mah se, hmeichhe himna venhim a pawimawh thu a sawi a. Immoral Traffic (Prevention) Act-in nawhchizawrhna, hmeichhe zawnsak leh nawhchizawrhna hmun siam emaw mahni in hmantirte chu dan anga na taka hrem theih an nih thu sawiin, zirhonaa thu ngaihtuahte chu hmeichhe himna atan chak taka bawhzui turin kalkhawmte a ngen a ni.
He hunah hian Khual zahawm Women and Child Development Director Zoramthangi Chhangte pawhin dan tha tak awm ringawt a tawk loh thu leh department hrang hrangte thawhhona bakah a tuartute humhalh leh enkawl danah dan hlawhtlinna a innghah thu a sawi.