Aizawl: Mizoram Public Service Commission (MPSC) thil tih dik loh chhui chiang turin High Level One-man Inquiry Commission din nghal a nih tur thu leh chhuitu atan GAD Secretary Sudhir Kumar ruat a nih tur thu Chief Minister Lalduhoma’n Thawhtanni khan Mizo Students’ Union (MSU) General Headquarters hruaitute a hrilh.
MSU thuchhuahin a tar lan danin an hruaituten chief minister hi a pisaah hmuin MPSC-in tun hnai kum hnih chhunga advertisement leh result a tihchhuahah tihdik loh leh siam that ngai a tam chu thawktute fimkhur tawk loh avangin leh inthlahdah avanga an ngaih thu an thlen a, chhui chiangtu tur High Level Inquiry Commission din turin an ngen a ni.
An inkawmnaah hian chief minister chuan MSU rawtna chu tha a tih thu leh Inquiry Commission din nghal a nih tur thu a sawi a, commission hian ni sarih chhung ngeia inquiry report chief minister hnena theh lutin report chu MSU hruaitute nen enho a nih tur thu a lo hrilh.
MSU chuan MPSC chairman bâng tura an ngenna lehkha chu MPSC office-ah an thehlut bawk a, an lehkha hi MPSC chairman Personal Assistant K. Vanlalmuanpuii’n a dawng a ni.