Aizawl: Food, Civil Supplies & Consumer Affairs (FCS&CA) Department hnuaia storekeeper hna lakah mark tabulation tihsual tam tak hmuh chhuah a nih avangin MZP chuan Mizoram Public Service Commission (MPSC) secretary leh Controller of Examinations-te chu November 20, 2026 ral hma ngeia thlaka mi thar ruat turin sorkar an phut.
Thawhtanni khan Aizawl Press Club-ah thu thar thehdarhtute an kawmnaah MZP President C Lalremruata chuan December 19, 2025-a storekeeper post 15 ruak atana advertisement tihchhuah tawh, October 27, 2026-a a tlingte appointment order pek tawh leh ni nga training neihpui mek laia written examination result mark tabulation tihsual a awm thu hriat a ni chu mak an tih thu a sawi a, MPSC chuan insiam that a tum lo nia an ngaih thu a sawi.
C Lalremruata chuan hna lak dik lohna chhui chiang tur hian tun kar chhung ngeia inquiry committee dina thla khat chhunga report peih turin sorkar an phut tih a sawi bawk.
August thlaa MZP-in MPSC siam that nana peaceful protest an neih hnua din, MPSC Reform Committee-in thla hnih chhunga rawtna ngaihtuah tura tih a nih laiin hun tiam a zawh hnu thlenga zirlai leh hna zawng mekte rawtna an la ngawih bopui chu zirlaite leh thalaite zah lohnaah an ngaih thu sawiin MZP president chuan, “A rang lama thu thar nei turin sorkar kan phut a ni,” a ti.
An thil phutte hi tihhlawhtlin a nih loh chuan MPSC siam that kawngah nasa zawka hmalak dan tur an ngaihtuah dawn thu a sawi bawk.