A tir atanga a tawp thleng damin Vanlalruatpuii’n ball 38 a hmachhawnah run 49 vaw chhuakin Nagaland lakah wicket riatin Mizoram a chakpui a. Khelh thumah la chak vekin Women’s Under 23 Trophy Plate-ah hma an hruai chhunzawm.
Tripura-a tournament khelh mekah hian team ruk inelin vawi thum theuh khel tawhah Mizoram hian Sikkim leh Meghalaya an lo hneh tawh a, anni ang bawka la chak vek, Manipur nen point 12 ve ve hmu tawh mah se net run rate sang fal tak nei chungin hma an hruai.
Thawhlehni chawhnua Agartala khawpuia MBB Stadium-a group stage inkhel vawi thumnaah hian thum vawrah Nagaland chakin vuak hmasak an thlang a, over 20 chhungin run 77 siamin mi pariat an thi.
Mizoram tan Venghnuai, Aizawl nula, senior team tan pawha tangkai tak, ZD Lalnunhrili’n over li a vawmah wicket hnih lain run riat a pe a. Lalnunmawii, Sandhia Rai leh captain Lalhmangaihsangi (Mami) ten wicket khat theuh an la bawk.
Chak tuma an mamawh run an umnaah Ruatpuii’n bul a tanpui, Jacinta Laltanpuii thi nghal mah se Tlangnuam Vengthar nula hi nghet takin a ding a. Captain Mami’n run kua thawhin Malsawmtluangi’n thi lovin run 22 a vaw chhuak bawk a. Over 12.3-ah run 83 tlinin mi pahnih chiah an thi.
Women’s U23 T20 Trophy Plate hi Board of Control for Cricket in India (BCCI) hnuaia la hnufual state parukin an khelh niin an inkhelh kual chhuah hnuah a sang pahnihin final an lut dawn a, champion chu season lehah a thiam rual, elite-ah an kai dawn a ni.
Mizo nulate hian Ningani hian vawi hnih chak tawh, Arunachal Pradesh an hmachhawn leh dawn a, an chak a nih chuan final an lut tawh dawn a. An chak lo a nih pawhin khelh dawt lehah Manipur an hmachhawn leh a la ngai dawn a, final lut turin an dinhmun a la tha rih hle.
INKHEL KHAIKHAWMNA:
NAGALAND – 88/8 (Over 20)
Bipila – 29* (36)
ZD Lalnunhrili – 2/8 (Over 4)
Mizoram – 83/3 (Over 12.3)
Vanlalruatpuii – 49* (38)
Malsawmtluangi – 22 (19)
Wicket riatin Mizoram an chak.