Aizawl: North Eastern Electric Power Corporation Limited (NEEPCO) chuan Ministry of Power hnuaia Bureau of Energy Efficiency (BEE) bultumin Thawhlehni khan Vaivakawn YMA Cultural Centre-cum-Auditorium, Aizawlah ‘Mizoram State-Level Painting Competition on Energy Conservation 2026’ a buatsaih a, kumin December 11-a New Delhi-a neih tur National Level intihsiaknaa Mizoram aiawh tur zirlaite thlan chhuah an ni.
Mizoram district 11-a school 102 atanga tel zirlai 2,448 zinga a tha thlan chhuah zirlai 100-te inelna hi jury member paliten an endik a, chawhnu lama lawmman semnaah School Education Department Director Angela Zothanpuii chu khuallian niin, Deputy Director Zoramchhani chu khual zahawm a ni.
Intihsiakah Group-A (Class V–VII)-ah Gabriel Lalpekhlua (Radiant Hearts, Thingsulthliah) chu pakhatna niin, Anwasha Kundu (Kendriya Vidyalaya, MZU) chu pahnihna leh Suraiya Parvin (Mary Mount School) chu pathumna an ni a. Group-B (Class VIII–IX)-ah Nicole Lalruatpuii (Baptist Higher Secondary School, Serkawn) chu pakhatna niin, Melody Lalnunpuii (Buhban Secondary School) chu pahnihna leh Rody Lalrawngbawli (Presbyterian School, Thingdawl) chu pathumna an ni thung.
Lawmman pakhatnain Rs 50,000, pahnihnain Rs 30,000 leh pathumnain Rs 15,000 an dawng a, group hnihah consolation prize Rs 7,500 theuh zirlai 10 ve ve hnenah sem a ni bawk.
Group tin atanga a titha zual pathum theuhte hian National Level intihsiaknaah Mizoram ai an awh dawn a ni.