RD&A dept-in VB-G RAM C state matching share pe thei lo anga sawi sawi fiah

Aizawl: Viksit Bharat-Guarantee for Rozgar & Ajeevika Mission (Gramin) (VB-G RAM G) hnuaia State Matching Share Mizoram sorkarin a pe thei lo anga sawi chu mipui rilru hruai kawi tumna leh thu dik lo a nih thu rural development & administration department chuan thuchhuah siamin a sawifiah.

Department tar lan danin, June 9, 2026-a Union Minister for Rural Development Shivraj Singh Chouhan hova video conferencing neihah July 1, 2026 atanga VB-G RAM G hman tan tur atan state budget peih thuai tura hriattir an nih hnu lawk, June 10 khan central-in Mizoram tan Interim budget Rs. vbc 611.65 a rawn pe a. June 17, 2026 khan Mizoram Finance Department pawhin zaa 10 State Matching Share Rs. vbc 67.96 chu RD Department hnenah a pe nghal vek a, July 1 hma daih khan Mizoram sorkar chu a lo inpeih at tawh zawk a ni.

Chubakah, Mizoram sorkar chu India rama State VB-G RAM G Scheme notification, 60-days pause notification leh dan pawimawh hrang hrang (Rules) chhuah hmasa ber leh state dangte hmakhalhtu a ni bawk.

Inhlawhna sum luh har chhan sawifiahin, tunhma aiin sum kalphung a kual deuh tawh a; Fund Transfer Order (FTO) sign hnuah State IFMIS leh Cyber Treasury kaltlangin MoRD PFMS Division leh RBI u-Kuber-ah te kalpui leh phawt a nih hnuah State IFMIS-ah lut lehin mipui account-ah a lut chauh thin a ni tiin, thudik tluantling lo thehdarh fo chu tha an tih loh thu sawiin, mipuite thlaphang lo tur leh hriat belh duh chuan VB-G RAM G State Cell-ah zawhfiah reng theih a nih thu an tar lang.

Leave a Reply

error: Content is protected !!