Aizawl: BJP Mizoram chuan VB-G RAM G hnuaia inhlawha thawktuten kumin June, July leh September atanga hlawh an la la lo chu pawi an tih thu sawiin, Krismas hma ngeia hlawh pek lohte tihfelsak turin Chief Minister Lalduhoma kaihhruai sorkar an phut.
BJP Mizoram thuchhuah chuan VB-G RAM G (Ni 100 inhlawhna) hi thingtlang mipui leh rethei zawkte tana innghahna pawimawh tak a nih laiin ZPM sorkarin thla hnih/thum chuang hlawh a pe lo chu retheite hmuhsitnaah an ngaih thu an tar lang. A lang maia mi rethei hmangaih anga lan ringawtin an harsatna a phuhru lo tih sawiin, hlawh lak hun nghakhlelte au thawm chu ngaihthah lo turin sorkar an ngen.
Harsatna chungchangah hian Union Agriculture & Farmers’ Welfare & Rural Development Minister Shivraj Singh Chouhan-a pawh biak a nih tawh thu an sawi a. Union minister chuan MGNREGA Matching Share pe thei lo state pali zingah Mizoram a tel thu leh, state-in Matching Share a pek loh chuan central atanga sum pek chhuah theih a nih loh thu a lo hrilh a. Hei vang hian ZPM sorkarin Matching Share a ngaihsak miah lo chu vanduaithlak an tih thu leh, mi retheite an ngaihsak loh zia a taka tihlannaah an ngaih thu an sawi bawk.
Kristiante hunpui ber Krismas a hnaih tawh avangin, mi rethei zawkte lungngaihna belhchhah lo tur leh an inhlawhna sum zawng zawngte Krismas hma ngeia pe vek turin BJP Mizoram chuan sorkar an phut a. Mizoram sorkarin a tih tur a ti lo a nih chuan BJP Mizoram chu mipui tan an ding chhunzawm zel dawn a, Krismas hma ngeia mipuiin an hlawh an lak theih nan hma an la zel dawn tih an tar lang.