Assam zirlaiten larsap kawm

Aizawl: Assam Rifles leh Haflong-a innghat tlawmngai pawl ‘A Ray of Hope Society’ tangkawpin Dima Hasao, Assam-a zirlaite tana an buatsaih, Inter-State Educational Tour neia Mizoram tlawh mekte chuan Thawhlehni khan Larsap General (Dr) Vijay Kumar Singh chu Lok Bhavan, Aizawlah hmuin an inkawm.

Larsap General (Dr) Vijay Kumar Singh chuan Dima Hasao atanga zirlai lo kalte chu Mizoramah a lo lawm thu sawiin, an cham chhungin Mizo hnam ziarang, nunphung leh tawngte a tam thei ang ber zir tum tur leh chin dan tha leh entawn tlakte hawna nunpui tum turin a chah a. Zirlaite chu mahni nuam tihna hmunah chauh awm lova hna zawnga hmun danga chhuah hreh lo tura fuihin, zirna ngai pawimawh tur leh thil thar zir zel tum turin a fuih bawk.

Tribal zirlaite chawikan nana A Ray of Hope Society hmalakna chu chhuanawm a tih thu leh educational tour an neih theih nana ruahmanna siamsaktu Assam Rifles-te chu fakawm a tih thu a sawi.

An inkawmnaah zirlaiten larsap hnenah zawhna hrang hrang an neihte zawtin hun an hmang a, Brig. Puspendar Sorayan, DIG, 23 Sector Assam Rifles, A Ray of Hope Society founder member Mithun Sarkar leh official dangten an telpui a ni.

Leave a Reply

error: Content is protected !!