Excise constable lakah physical fitness leh written mark inzat tawh – Excise Minister

Aizawl: Sports minister, excise minister ni bawk, Lalnghinglova Hmar chuan excise constable hna lak danah thlak danglam a awm tawh thu sawiin, physical fitness leh written mark a inzat tawh thu a sawi.

Thawhtanni zana Chanmari YMA Hall-a Inter District U-17 Girls Football Championship 2026-27 a hawnna inkhawmah minister chuan tun hma chuan sorkar recruitment thenkhat, bikin excise department-ah constable lak an nih dawnin fitness paltlang hnuah written exam paltlang leh a ngaih thin thu leh chu chu a fair lo nia a hriat avangin DP&AR lamah te tih dan thar zawnpuia hma a lakpui thu a sawi a. Excise department constable hna lak hnuhnung berah physical fitness leh written mark chu a inzat chiah chiah tawh tih sawiin, hei vang hian lehkhathiam sang lutuk lo pawh an taksa a fit phawt chuan hna an tlin thei tawh dawn a ni tiin a sawi.

Sports minister chuan India-a hmeichhe football dinhmun chu nasa taka hma sawnin, FIFA ranking-ah pawh mipate aiin hmeichhe ranking a san zawk thu a sawi a. Hei vang hian Mizoram Football Association (MFA) hotuten hmeichhe football chu tihtakzeta an kalpui a ngaih avangin he tournament hi buatsaih a nih thu a sawi bawk.

Zirtirna tha zawk pe zelin football bakah infiamna dangah pawh fitness culture siam an tum reng a ni, a ti.

Inter District U-17 Girls Football Championship 2026-27 hi Mizoram district hrang hrang atangin team tel kim vekin Aizawl District Football Association (ADFA) chuan an thleng a, Thawhtanni zana hawnna neih a nih hnu hian Thawhlehni zing dar 7:30 khan RG Stadium-ah inkhelte tan nghal a ni.

Leave a Reply

error: Content is protected !!