Nipui bazar boruakin min nghawng – Vini

Real Madrid forward Vinicius Jr chuan nipui bazar laia Santiago Bernabeu chhuahsan thei dinhmuna a ding reng khan a nghawng thu a sawi a, tun season-a a khelh that loh chhanah a ngai.

Vini hian tun season inelna hrang hrangah Real tan vawi 12 khelin, goal khat chiah a la khung a, a thiante thun tur vawi thum a siamsak bawk a. Nipui lai khan Arsenal nen sawizawm a ni a, Real nen contract thar chungchangah an indawr reng bawk a. World Cup-ah Brazil chu an beisei ang a thlenpui lo a, round of 16-ah an tla.

World Cup-a an thlen chin hian nasa taka a nghawng thu a sawi tel a. “World Cup atanga kan tlak hnu khan season thar atana ka inpuahchah tur angin ka inpuahchah tawk lo ni berin ka hria. Kha tournament-in Brazilian zawng zawng min nghawng dan kha a na em a ni. Khatiang taka hmaa knockout kan nih kha kan inring lo reng reng a, kha vang khan ka chawlh neih chhunah khan, rilru tihhahdam nan nuam ti takin hun ka hmang a, ka chawl rei hret a, ka chhungte nen hun kan hmang nasa bawk,” a ti.

“Khatiang a nih avang khan season hmasaa kan chawlh lai ai khan training ka nei tlem a, chu chuan season tannaah nghawng a nei na lo thei lo a ni,” a ti.

Vini-a chuan a contract chuan a nghawng nat thu sawi telin, “Ka contract chiang lawk lo khan nasa takin min nghawng bawk a. Min lakluh tum club kha an tam em em a, Real-a ka dinhmun chiang lo bawk nen, ka rilru kha a buai hle a ni,” a ti a, football-ah tak tak rilru a pe hman tawk loah a ngai.

Brazil international hi October thlatira Villarreal nen an inkhelh tumin red card a hmu a, Villarreal midfielder Nathan Saliba chu a samah a pawt – match li ngawt inkhel thei lo tura hrem a ni.

Hrem a nih chhung hian Yan Diomande-a’n a hmun ruak a lo luah a, a chhawr tangkai hle a, goal li a khung tawh a. Vini-a hian hremna a tuar zo tawh a, Real hian Inrinni zan dar 1:30-ah Celta Vigo an mikhual dawn a. Real boss Jose Mourinho-a’n Vini a ko kir ang nge, Diomande a ring zui ang tih a la hriat loh a ni.

Leave a Reply

error: Content is protected !!