Mizoram Journalists’ Association (MJA)-in nimin khan DMC, Dawrpuiah Gen Conference hmangin, kum 2022-2024 chhunga hruaitu tur an thlang a. President atan C Lalrambuatsaiha (The Aizawl Post); Vice president atan Lalremsiama (Zawlkhawpui) leh Treasurer atan C Lalhmachhuana (Youth Herald) te bakah Executive Committee Member atan mi 11 an thlang.
MJA inkhawmpui hi Mizoram Assembly Speaker Lalrinliana Sailo chuan hmanpuiin, “Thangtharte leh mi thahnemngaite tihnual thei khawpa kan ram chhe vek tawh anga sawi hi a dik lo. State hrang hrangah ka kal ve nual tawh a, kan ram than dan hi a chhe em em lo. Hmasawnna tur kan nei tih erawh a dik,” a ti.
Lalrinliana Sailo chuan Reserve Bank of India-in state-te dinhmun a tehnaah hmarchhakah Mizoramin Sikkim chauh a tluk lo tih sawiin, “He ram hi kan chenna a ni a, kan la cheng zel dawn. A that leh that lovah mawhphurhna kan nei,” a ti a. “Kan ram thatna atana che chhuakin, a thalaiah infak i ching ang u,” tiin, journalist-te chu mi dangte a thalai kawhhmuh theitu an nih thu a sawi.
Social media-in min rûn mek nia a hriat thu sawiin, Lalrinliana Sailo chuan, “Sulhnu tha lo tak Zofa lo kal zel turah a thlen ka hlau, mahni hming pawh tilang ngam lovin thil an ti thin. Zorama a ni lo zawnga her tur veng turin MJA-te in pawimawh,” a ti a. Journalist dik tak chuan a thuchhuah tur a uluk thin a, social media-a fimkhur lo tak takte avangin thil tha lo a thleng thin niin a sawi bawk.
MJA President Zonunsanga Khiangte pawhin thu sawiin, kum 1990 chho atangin journalist pension an neih theih nan hmalak tan a ni tih a sawi a. “Tuna The Mizoram Working Journalists’ Pension Scheme, 2021 duan thar ber chu February 25, 2021 khan sorkarah thehluh a ni,” tiin, law department lama tih tur leh finance lam pawmpui tura peih a ni tawh tih a sawi.
Chawhnu lamah hruaitu thar thlan leh rorel inkhawm neih niin, official resolution – ‘Journalist pension pe tura Mizoram sorkarin hma a la mek hi lawmawm kan ti a. A rang lama tihhlawhtlin a nih theih nan chak taka hma la zel turin sorkar kan ngen a ni,” tih chu an pawm.
2022-24 MJA hruaitute
President : C Lalrambuatsaiha, The Aizawl Post
Vice President : Lalremsiama, Zawlkhawpui
Treasurer : C Lalhmachhuana, Youth Herald
Executive Committee Member:
1. Zohmingmawia, The Aizawl Post
2. C. Lalduhawma, LPS
3. Joseph Lalnuntluanga, Zorin
4. F. Lalrinfela, Zalen
5. H. Lalchhandama, The Zozam Times
6. Lal Rinmawia, Vanglaini
7. Lalnunzira Chawngthu, DDK
8. Alfred Vangchhawng, DDK
9. T. Lalbiakdika, Zawlbuk
10. Chhuanvawra, Lentlang
11. K. Zothanpara, Vanglaini