Aizawl: Mizoram Pradesh Congress Committee (MPCC) Executive Committee chu November ni 18, 2026 khan Congress Bhavan-ah Vice President R.L. Vala kaihhruaiin an thukhawm a, he hunah hian MPCC President Lal Thanzara chuan politics a khelh chhan chu chief minister nih ni lovin, kum 2028-a Mizorama Congress sorkar a din leh ngei theih nana hmalak a nih thu a sawi.
Lal Thanzara chuan Mizorama eirukna nuaibo a nih theih nan leh miretheite khawsak a lo awlsam zawk nan Congress sorkar siam leh a tul thu sawiin, ram leh mipui tana malsawmna ni tur leh Pathian malsawm tlaka nung chunga hma la turin party mite a chah bawk.
He thutkhawmah hian MPCC Executive Committee chuan resolution pass-in, BJP rorelna hnuaia India Danpui Article 25-28 in sakhaw zalenna a pek rahbeh a ni leh, Kristiante leh missionary-te chunga tihduhdahna hluar ta chu na takin an dem a.
West Bengal-a BJP sorkar a din hnu reilote chhunga Kristiante nekchepna tum 60 chuang a thleng nia United Christian Forum (UCF) report tar langin Congress party chuan an dem thu an sawi a, Foreign Contribution (Regulation) Amendment Bill, 2026 pawh tha ti lovin an do zel dawn tiin an pass bawk.
India rama sakhaw zalenna humhima a awm zel theih nan theihtawpa hma lak zel leh, ‘Kan ram, kan hnam, kan sakhua humhim leh tih hmasawn’ zel chu an tum ber a nih thu MPCC Executive Committee chuan an puang a ni.