Hun rei tak chhung James Bond nihna hnehsawh taka Daniel Craig-a’n a chan hnuah chawlh zai a rel dawn ta si a, a buatsaihtu lamin Mr. Bond tur an dap nghal char char a, mi hrang hrang hming a lang nual a, a tawpah chuan Robert Pattinson kutah James Bond nihna hlan a ni dawn ta.
A film siamtute chuan he thu hi puangin, Robert Pattinson chu official takin James Bond a nih tur thu an sawi a, heti hian Batman leh Twilight star hi Bond pasarihna tur a ni dawn a ni.
Kum 40 mi Pattinson hian kum 2021-a Daniel-a chan hnuhnung berna No Time to Die hnuah Bond nihna a luah zui tawh dawn a, screening hrang hrang paltlang zingah amah hi awm berah an thlang a, Bond tura hming langsar zingah hian Nicholas Hoult, Jack Lowden, Josh O’Connor leh Callum Turner te hming pawh a lo ri hman tawh bawk.
Mr. Bond ni tura an puang chu Robert chuan a lawm thu sawiin, a mumang ang mai a nih thu leh chona thar hmachhawn tura a inpeih thu a sawi a, film siam tura thawhhona tha tak an neih zui ngei a beisei thu sawiin, a phur tawh hle thu a sawi bawk.
James Bond film thar tur hi kum 2027 atanga siam tan tum a ni a, Amy Pascal leh David Heyman te chuan an siam dawn a, Bond film 26 na tur niin, ruahmanna an nei chho tan mek a ni.