Kan inhumhimna ILP kan thuamchak lehzual a tul

Rel hmangin kan khawpui ber kalpawh a awlsam lehzual tawh a, nitin khualzin rawn lut an tam leh tawh hle. Heng khualzinte hi dan dik taka lo lut leh phalna ngai ang ang paltlang a tam zawk an ni a, chutih laiin hemi remchanga la a dan dik lova lo luh tum pawh an tam hle.

Min depa awm leh min hual veltu vai tia kan sawi mai thinte hnam indaihzai leh khawsa ho tak an ni a, hnam hrang hrang lo chimral leh lo luahlan tawh pawh an ngah hle bawk.

Rel hmanga khualzin an lo luh mek lai pawh hian dan dik lova rawn luh tum, lo chuang chhoa kan ram chin an thlen hnua an duhna laia chhuk leh ta mai hi an awm nual tih a hriat a, tunhnaiah pawh hmun thenkhatah hmuhchhuah an ni leh nawlh nawlh ta mai.

Kan fimkhur a ngai a, station tinah hian dan dik lova lo lut leh kan himna ILP ngai pawimawh lo, remchang la a chhuk ve ngawt thinte hi kan check uluk lehzual a va ngai em. Chuti a nih loh chuan an inzarpharh thui zel ang a, heng mite hian hna hrang hrang thawkin, kan tih peih lo deuh apiangin an rawn thawk ang a, phalna nei lovin rei deuh kan ramah an rawn awm thei tih hi kan hriat thar a, kan harh thar a va tul em.

Kan ram hian chhantu a ngai a, a chhan thei turin tlawmngai pawl hrang hrang leh sorkar a chet thuai a tul a, kan himna ILP hi khauh lehzuala lek kawh nise la, hnamdang lo lutte hi uluk leh khauh zawka endikna kalpuiin, endikna hmun pawh tam zawk siam ni mawlh teh se.

Leave a Reply

error: Content is protected !!