Cyclone Akvan thawk tur avangin AP leh Odisha an inbuatsaih

Andhra Pradesh leh Odisha chu Zirtawpnia Cyclone Akvan thawk tur avangin an inbuatsaih a, cyclone hi tuipui atangin Andhra Pradesh-a Narsapur leh Odisha-a temple khua, Puri inkarah khawmual a kai dawn a ni.

India Meteorological Department (IMD) chuan Zirtawpni chhun lai velah Andhra Pradesh leh Odisha chhim lam vaukam hi darkar khata km 90 leh 100 inkar vela chak thlipui nen a lut dawn niin an sawi.

Akvan hi Nilaini zan thleng khan darkar khata km riat vela chakin, zawi muangin a kal a, Ningani atang khan a kal chak hret a. “Ningani hian Odisha leh Andhra Pradesh tuipui kam hmun thenkhatah ruah tam tawk tak a sur thei,” tiin IMD Director General Mrutyunjay Mohapatra-a chuan a sawi.

Odisha Special Relief Commissioner Rajesh Prabhakar Patil-a chuan a kalkawnga awm district collector-te hnenah dinhmun derthawng deuhte hai chhuaka multipurpose cyclone & flood shelter-ah hruai chhuak turin a hriattir a. Tuipui hnaia in chhawng hniha sanga cheng zawng zawngte chu tui fawn inphuh sang thei avangin insaseng vek a ngai dawn niin a sawi a, thli na tak tleh leh tui fawn nasa chu hlauhawm a ni thei tih a sawi.

Panchayati Raj leh Drinking Water Minister Rabi Narayan Naik chuan state assembly-ah tube well 5,46,417 tha a awm thu leh tui dah phur (tanker) 800, Sintex tank 1,000 leh tui in tur um nuai 7.47 dah khawl a awm tih a sawi a. Department-in generator 400, tui sawngbawlna 13 leh bleaching powder ip 8,000 an inring a. Electrician leh plumber-te pawh eng emaw chhia a awma rang taka siam tha thei tur leh an hmanraw mamawhte inring sa tura hriattir an ni.

Odisha-ah hian Ganjam, Gajapati leh Malkangiri-ah chuan Ningani leh Zirtawpniah zirna in khar vek a ni a. Puri-ah chuan district thuneituten Ningani atanga Inrinni thlengin Lord Jagannath-a hnena inhlanna, Kartika thla an hman mekah Habishyali tih rih loh turin an ti a. Gundicha temple pawh hemi chhung hian khar a ni dawn bawk.

Andhra Pradesh Home Minister Vangalapudi Anitha chuan Nilaini khan sorkar department tinte chu darkar 48 lo awm leh tur chu inring renga awm turin a hriattir a. Rikrum thleng palha che chhuak thei turin National Disaster Response Force (NDRF) team 13 leh State Disaster Response Force (SDRF) team 11 bakah fire services-a thawkte an inrintir a. Heng team-te hi hmun hrang hrangah, a bikin dinhmun him lo zual deuh nia hriatna laiah dah an ni tih home minister chuan a sawi.

State Disaster Management Authority (SDMA) Director Prabhakar Jain-a chuan Andhra Pradesh hmar lam district-a chengte chu inralring tur leh cyclone thawh dan thlithlai uluk turin an chah tih a sawi a. Hmun him lo deuh zuala chengte chu rehabilitation centre-ah an sawn chhuak bawk tih a sawi.

Lo neitute pawh lo lam hna thawka chhuak rih lo tur leh khaw chin thlir chungin, ruah sur nasat leh thli nat en chung zelin, chhiatna thleng thei laka inveng chunga awm turin an chah tih home minister chuan a sawi.

Andhra Pradesh Energy Minister Gottipati Ravi Kumar-a chuan power distribution company (DISCOM) pathuma thawktute chu cyclone thawk tur avanga inring tur leh electricity network chhia a awm tlem theih nana inbuatsaih lawk turin a ti a. Minister hian DISCOM-te hi chhia a awm pawha siam tha nghal thei tura an hmanraw mamawhte dah khawm lawk turin a ti bawk.

Ravi Kumar-a hian Telangana energy minister hnenah pawh lehkha a thawn thu leh a tul anga an state atanga thawktu an mamawh palh chuan pui turin a ngen lawk tih a sawi.

Leave a Reply

error: Content is protected !!