Israeli sipaite chuan an thunun chin pawn lam, Gaza lailiah chengte insaseng tura an tih tukah beihpui an thlak an zo fel tih an puang.
Nilaini khan Nuseirat refugee camp khawchhak leh Gaza chhim leh hmar inkalpawhna kawngpui bul vela in leh puan ina cheng chhungkuate chu laipui hmanga beihna a awm theih avangin insaseng tura tih an ni.
Israeli sipaite chuan beihpui thlakah hian Yellow Line an tih, Israel-in Gaza 60% chuang an luah mek chin chhinchhiahna chin khawthlang lama ‘terror tunnel’ an tih ‘bitum’ a nih thu an sawi.
Palestinian ralthuam keng pawl, Hamas-in Gaza-a Israeli-te thunun loh chin hi an thunun mek a, Israel chu October, 2025-a inkahhai an siam thuthlung ‘chiang taka bawhchhiaah’ an puh.
Gaza-ah hian inkahhai awm ve bawk mah se thla 13 liam ta chhung khan ni tin deuhthawh Israeli-ten silai an hmet puak a, mi maktaduai 2.1 chuang chengte chu dinhmun harsa takah an ding mek.
Tun tuma Israel Defense Forces (IDF)-ten Yellow Line pawn lama beihpui an thlak hi inkahhai puan hnua a hmasa ber a ni.
Nilaini chawhnu herah Israeli military body Cogat chuan Arabic tawngin beihpui thlak tan a nih thu leh Nuseirat hmar leh Bureij refugee camp-a cheng Palestinian-te chu an him nan insaseng turin an ti a. Salah al-Din kawngpui thenkhat pawh lirthei kal theih lohva khar a ni bawk.
Zan lamah IDF hian Shin Bet security service nen ‘IDF sipaite tana hlauhawm ni thei, Yellow Line khawthlang lama tunnel-te tihchhiat tuma beihpui thlak a ni’ tih an puang zui.
Ningani tuk khan Cogat chuan Palestinian-te hnenah ‘beihpui thlakna a tawp a, Salah al-Din pawh hawn a ni leh tawh’ tih social media-ah a puang zui a ni.
Hamas chuan Yellow Line pela Israeli sipai lut leh mi chengte insaseng ngai chu ‘chet chhuahna hlauhawm tak leh inkahhai thuthlung bawhchhiatna chiang tak’ tiin a sawi.
Gaza-a Hamas enkawl sorkar chanchinbu pisa chuan mi 6,000 velin an in leh puan in an chhuahsan phah a, tlanchhiate insaseng ngaia awmtir hi indonaa dan bawhchhiatna a tling tih an sawi.
Gaza-ah hian mi cheng 90% chuang, mi maktaduai 1.9 chuang chu baihvaiin an la awm mek a, mi maktaduai 1.4 vel puan in leh awmna tur siam chawpah an khawsa mek tih UN-in a tar lang.
Indona avanga chhe tawh Gaza tun din hna tan a la ni lo va, thil ding 82% vel chhia a awm nia chhut a ni a, US President Donald Trump-a’n muanna a awm nana a ruahmanna siam chu hma lam panin a kal hleithei lo.