Pumpui harsatna hriat chhuah hma a pawimawh – Dr Goel

Aizawl: Pumpui na reng, pum puar, pumpui thur, ek khal, kawthalo leh ek dan danglam ang chi hi pumpui emaw thin emaw natna inthup a ni thei a, ngaihthah mai loh tur a ni tiin Dr Akash Goel, Associate Consultant, Gastroenterology, Max Super Speciality Hospital, Saket chuan a sawi.

Pum lam sawiselna Irritable Bowel Syndrome (IBS) leh functional dyspepsia ang chi natna te’n harsatna thlenin, nunphung a tibuai thei a, hetiang symptom vek hi inflammatory bowel disease, coeliac disease leh pumpui infection ang natna serious zawk pawh a ni thei a, doctor-in uluk taka a enfiah a pawimawh, tiin Dr Goel chuan a sawi bawk.

Thin natna, fatty liver, viral hepatitis leh cirrhosis ang chite chu lang chhuak miah lovin a thang lian thei a, thau lutuk, zunthlum leh metabolic disorder pun zel avangin fatty liver vei an pung zel a ni. Thisen test, ultrasound leh FibroScan hmanga hriatchhuah hma chuan enkawlna a hun taka pek leh nunphung siam that hmangin harsatna lian zawk thleng tur a veng thei a ni.

Pumpui enkawlna lama hmasawnna chuan natna hriatchhuah leh enkawl a ti awlsam tawh a, Narrow Band Imaging (NBI) telna image-enhanced endoscopy chuan natna hriat hma leh cancer hma lam inthlak danglamna te a hmuchhuak thei a, Endoscopic Mucosal Resection (EMR) leh Endoscopic Submucosal Dissection (ESD) hmangin cancer insiam tan tir te chu zai pui ngai lovin a paih chhuah theih tawh a ni.

Chhan hriat loha rihna tla hniam, eka thisen tel, thil lem harsat, mit leh vun êng, pum vûng leh ek dan danglam rengte chu doctor rawn vat a ngai a, gastroenterologist pan thuai a nih chuan a hun taka hriatchhuah leh enkawlna dik tak pek hmangin harsatna lian zawk a pumpelh theih a, natna pawh a dam hma bik a, chu chu hrisel taka dam reina a ni, tiin Dr Goel chuan a sawi a ni.

Leave a Reply

error: Content is protected !!