Aizawl: Labour, Employment, Skill Development & Entrepreneurship (LESDE) Minister Lalnghinglova Hmar chuan Ningani khan Directorate of LESDE Auditorium-ah Mizoram Building & Other Construction Workers’ Welfare Board (MBOCWWB) hnuaia member inziak lut leh an fate tana thiam thil zirna project thar, ‘Eizawnna Kailawn’ a hawng.
Hawnna inkhawmah Lalnghinglova Hmar chuan kut hnathawktuten an hamthatna tur an dil lo thin chu pawi a tih thu sawiin, MBOCWWB-ah inziak lut zel tur leh midangte pawh hrilh hre turin kalkhawmte chu a chah. Kut hnathawktuten an dikna chanvo leh hamthatnate an hriat zel theih nan awareness neih a pawimawh thu sawiin, multimedia campaign pawh neih chhunzawm zel tum a nih thu a sawi.
Sorkarin kut hnathawktute fate nihlawh taka siam a duh thu leh lehkha thiam tura kaihhruai that an pawimawh thu Minister chuan a sawi a, Board-a inziak lut fate sikul luhna tur tihchak zel nan School Education department nen an indawr mek tih a sawi bawk.
“Eizawnna Kailawn project chu mi retheite bana kaihna leh khaichhuahna tura duan a . Damloh leh chhiat tawh thila pawisa an lak chhuah ve theihna tur leh an faten zirna kawnga hamthatna an dawnna tur atan a pawimawh hle a ni,” Lalnghinglova Hmar-in a ti.