Aizawl: Inrinni kaltaa Serchhip Bazar-ah vantlang inkhawmah thu sawiin Congress party president Lalsawta chuan, “Ka ta a ni lo tih chul ngai khawpa sum ngah nih hi ka tum ve lo,” a ti.
MPCC President Lalsawta hian, “Mizo mipuite hi keimahni leh keimahni kan inchhanchhuah a ngai a, eng ram mahin min chhanchhuak dawn lo. Kei chuan beiseina hi ka tlangaupui a ni. Kan \halaite hian keini puitling tawhte, upa zawkte ai hian ram an vei zawk daih a, dikna pawh an duh zawk. Chu chu Mizoram siam\ha tura beiseina ka neih chhan a ni,” tiin, ‘ka ta a ni lo’ tih chul ngai khawpa sum ngah nih a tum ve loh thu a sawi.
Politics hi a \ha zawnga her dik a ngai tih sawiin, “Burma ram nasa taka an buai chhante, indona avanga Ukraine buai em em chhan pawh khu politics vek a ni. Chuvangin, politics-ah hian ka tel ve lo ti ringawt loin, siam\hat tumin theihtawp i chhuah ang u, politics \ha lo hian kan zavaiin min hrut vek tho a ni,” a ti a. Politics hmangin sorkar \ha siam a, chutiang tur chuan mi zawng zawng thawhpuiah a sawm.
MPCC Vice President Lal Thanzara pawhin thu sawiin, MPCC President Lalsawta kaihhruaina hnuaiah sorkar \ha zawk siam an thu a sawi a. “Nasa taka danglam hi kan tum,” a ti.
Mizoram hmasawnna lian tham zawng zawngte Congress sorkar hnathawh deuh vek a nih thu Lal Thanzara hian sawiin, “MNF-in kawng chhawng leh traffic jam free min tiam a, a taka hmuh tur pakhatmah a la awm lo. Cheng nuai thum sem an tiam a, cheng nuai thum dawng chhungkaw pakhat pawh an la awm hek lo,” a ti bawk.
Thusawitu dang, Congress Treasurer Zodintluanga Ralte hian MNF sorkarna hnuaiah Mizoram budget hian loneitute hnen a thleng phak lo tih sawiin, “MNF sorkar kum li chhung hian lo neituten engmah an la dawng lo; Kamrula te, Abu Majumdar-a te hnen a thleng daih,” a ti.
Kum li chhunga SEDP sem dan tur engmah ruahmanna a la awm lo hi Mizoram mipuite zah lohna dik tak a nih thu sawiin, Zodintluanga Ralte hian, “SEDP hnuaiah Bekang leh telhawng hmanga intodelh tir min tum a, hma an la mek. Chutih laiin, Assembly zawhnaa SEDP hnuaia \anpuina pek turah trade thlan fel a la nih loh thu an sawi leh lawi si,” a ti a. SEDP hi eng ber hi nge tih pawh hriatthiam har tak a nih tak thu a sawi.
Congress Treasurer hian, “Hotu lu berin a zir loh chuan a thawhpuite pawhin an zir thei lo. Kan President Pu Lalsawta chuan, ‘Kan Minister leh MLA-te eirukna, hlemhletna thila mualpho an awm chuan ka bân dawn’ a ti. Chutiang a huaisen tur khawp chuan amah hi a dik tlat. Hei hi keini a hminga Minister lo ni tawh \hinte pawh hi kan mualpho a nih chuan min ban mai dawn tihna a ni,” a ti a. Hetiang taka huaisen hian Lalduhoma te, Zoramthangate hian an la sawi ve ngai lo a, an sawi ve ngam pawh a rin loh thu a sawi bawk.
Serchhip Bazar-a Congress Party-in vantlang inkhawm a buatsaihah hian Serchhip khaw tlangval, ISL player Mark Zothanpuia chawimawina hun hman a ni bawk.
Congress Party-in Mizoram chhim lam tlawh a ‘Chhim hrut fehchhuah’ hun a hman chu Inrinni khan an zo fel a. Chhim hrut fehchhuahah hian MPCC Office Bearer thar pathumte an kal kim vek a. Khaw hrang hrang 30 chuang tlawh niin, Congress Party zawm thar mi 3800 chuang an lawm lut a ni.