Aizawl: MNF president Zoramthanga’n, “Zu zuar sorkar kan hrawn lova kan vanneihzia hi hripui lo leng hian a tilang,” tiin, “Inthlanpui kan hmachhawn leh turah pawh tun aia tam zawk hruaitu neiin MNF hi a sorkar leh ang,” a ti.
Serlui North block MNF conference Vairengtea a hmanpuinaah he thu hi nimin khan MNF president chuan a sawi a. “MNF hi hnam rilru pu kan ni a, kan chhungkuaah tumah a hlui leh a thar kan awm bik lova, a neitu vek kan ni, rilru nghet puin tan ila thar theuh ang u,” tiin, party mipuite a fuih.
MNF president chuan Central lamah Congress kaihhruai a tluchhe zel nia sawiin, UPA hotu mumal tur pawh an vai tan niin a sawi a. “Inthlanpui lo awm lehah Congress hian seat nga an chan chuan a lawmawm ngawt ang, an muk berna hmun West Tuipui pawh RD block thar avangin an ri hulh hulh tawh a, mi sang chuangin min rawn luhchilh tawh a, bial dang pawh a kangkai chho mek zel a ni,” a ti.
“MNF ni lo, Congress ni lo titu, ZPM pawhin ‘party kan ni lo, movement kan ni,’ an ti a, mipuiah an intawktarh a, chanchinbu leh TV hmanruaa hman bik neiin an han che tak tak a, an thawm chu a ring nasa; mahse, miin an lo hrechiang em em si a, under 10 bak an pel lo,” MNF president chuan a ti a. “Mi nghet nih a pawimawh fo angin zuansawn zin lutuk hi a pawina a lo lang mek zel a ni,” a ti bawk.
Serlui North block MNF conference-ah hian MNF president-in mi thar 598 a lawm lut niin MNF party thuchhuah chuan a tar lang bawk.