Aizawl: Chief Minister leh MNF president, Zoramthanga hi a sawi loh dan zela awm a nih avangin kum thara MLA inthlanpuiah Congress an tling dawn niin Congress party Treasurer Zodintluanga Ralte-in a sawi.
Congress Treasurer Zodintluanga Ralte, MLA, chuan a bial Thorang a fan meknaah Marpara South, Terabonia, New Sachan leh Mauzamahte vantlang inkhawm a buatsaihah thu sawiin, Chief Minister Zoramthanga chu a sawi loh ang zela awm a nih thu a sawi a. “Kan chief minister hi a sawi loh dan zela awm a ni a, ‘Congress an artelukawn dawn, MLA 30 kan la dawn,’ a ti a, ‘Congress kan tling dawn,’ tihna zawk a ni. Chuvang chuan pawl danga lo awm tawh zawng zawngte pawh Congress party-a lo awm leh turin ka sawm vek che u,” a ti.
Zodintluanga Ralte chuan sorkar leh turin Congress party a inpuahchah mek tih sawiin, “Mi zawng zawngin mi dik, corrupt lo an tih Pu Lalsawta kan zuar a ni,” a ti a. Mizoram sorkar sum leh paiah a tlakchhiat thu leh, hetiang hi Congress sorkar laiin a awm ve ngai lo a, sum dinhmun a \ha a, mi tinin an chhawr tih a sawi.
Kum li dawn MNF an sorkar tawha vawiin thlengin mipuiin cheng khat pawh an la dawn loh thu sawiin, “Tunah kum li dawn an sorkar tawha beisei tur an awm lo a ni. SEDP hi an tlinpui a; mahse, an tlakpui leh dawn a ni, a chhan chu tumah cheng nuai thum an pe lo tlat a ni,” a ti.
Mizoram pumah mi rethei mi harsa zawk chhanchhuahna programme pakhat mah a la awm lo tih sawiin, “Central a\anga pawisa lo kalte khawnge an hman ni ang. Mi rethei zawkte in sakna installment pawh an pe thei tawh lo a ni,” CLP leader hian a ti bawk.
“Politics hi invauna tur a ni lo a, intihtheihna tur a ni lo a, mi harsa zawkte dawmkanna tur zawk a ni. Mipuite an vau a nih chuan keimah min vauah ngai rawh se,” tiin Zodintluanga Ralte hian a bial mipuite thlavang a hauh thu a sawi a. “Sorkar awmze nei lo, mipuite hian kan hrawn a ni. Sorkar \ha lo hi a rang thei ang bera kan paih a ngaia sorkar \ha kan din leh a ngai,” tiin a sawi.
Thorang bialtu MLA hian Marpara South-ah Congress zawm thar mi 64 a lawm lut. Lawm luh zingah hian VC Vice President a tel a ni.