Kamalpur-a chanchinbumite chuan Chief Minister Biplab Kumar Deb chu an boycott a. Tripura-a BJP-in ro an rel hnuah kawng hrang hranga chanchinbumiten beih leh harsatna an tawk nasa hle tih an sawi.
Inrinni khan chief minister hian Dhalai district-a Kamalpur hi a tlawh a. A hun hmannaah hian chanchinbumi tumah an tel lo va, a hun hmanna pawh an chhuah duh lo vek a. Hei hi tun hnaia Tripura-a chanchinbumiten beih an tawh fo duh lohna lantir nan an tih a ni.
Hemi ni vek hian an khawpui, Agartala atanga Bengali tawnga tihchhuah, ‘Pratibadi Kalam’ chu a copy tam tak Udaipur Rajarbagh motor stand-ah tihchhiat a ni bawk.
He thil thleng avang hian chanchinbumi tam tak chu Agartala-a police headquarters-ah an kal a, deputy inspector general, southern range an hmu.
Chanchinbu suasamtute hi darkar 24 chhunga man an nih loh chuan police headquarter kawtah lungawi lohna an lantir tur thu an hrilh.
Assembly of Journalists chairman, Subal Kumar Dey-an thuthar lakhawmtute a kawmnaah sorkarin chanchinbu copy tichhetute laka hma a la lo a nih chuan an state pumah chief minister chu an boycott dawn thu a sawi.
Chanchinbu copy 6,000 vel zet hi passenger phur bus-a thawn niin Gomati district-ah hian Inrinni khan mi tute nge hriat lohten lo tiding an hlang thla a, an tichhia.
Pratibadi Kalam chanchinbu editor chuan agriculture minister leh director chu ei ruknaah an inhnamhnawih niin a sawi a. He ei rukna thi hi an chanchinbuah hian zaih a ni a, chu chu a darh lohna turin hetianga che hi an nih a rin thu a sawi bawk.
Chanchinbu beihna
Pratibadi Kalam editor Anol Roy Chowdhury chuan district hrang hranga an thawn tur bus-a an chanchinbu copy 6,000 vel chu tihchhiatsak an ni tih a sawi.
A chanve vel hal niin a dang chu theh darh a ni tih a sawi.
Editor hian bus atanga hlangtute hi mi 11 vel an ni tih a sawi.