aIZAWL: Commerce & industries minister Dr R Lalthangliana chuan, Mizo puan leh puan atanga thil siam chhuahte chu tam tham zawk India pawna hralh chhuak turin ruahmanna an siam theih tur thu sawiin, puantah te chu quality tha zawka tih phuisui erawh a tul tih a sawi.
Mizo puan chi hrang hrang leh puan atanga siam thil dangte pho chhuahna, state handloom expo hawnna nimina neihah Dr Thangtea chuan Mizo puantah te chu hnamdangin an ngaih hlut thu a sawi a,”Foreign-a thawn chhuak tur erawh chuan quality tha zawka siam chhuah erawh a ngai,” a ti.
Tun hnaia USA a zinnaah pawh Mizo thuam a ken te chu hnamdang te’n an lo hlut sak hle a, hengte avang hian a hralhnaah chuan harsatna a awm a rin loh thu a sawi.
Mizo puantah te a market a that zel theih nan chuan puan tahtute pawhin designer te pawh an rawih chhoh a tul dawn tiin, puantah tute chu Mizo te hnamzia pholangtu pawimawh tak an ni tih hria a, tan la zual zel turin a chah.
Commerce & industries minister chuan, handloom expo chu puantah tute’n an thil siam chhuah te an pho chhuahna hun tha tak a ni a, Aizawl bakah district dangah te pawh expo chu buatsaih zel a that thu a sawi a, department hotute pawh puantah tute in pho chhuahna tur remchang siam sak kawnga hma la zual zel turin a chah a ni.
Development for Handlooms, Ministry of Textiles bul tuma Commerce & Industries Department hnuaia Handloom, Textile & Handicrafts Wing-in an buatsaih Handloom Expo ah hian stall 30 awmin, Aizawl leh a chhehvel bakah Sailam, Mualthuam North, Thenzawl leh Khawbunga puantahtute siam chhuah, Mizo kutchhuak hnam thuam chi hrang hrang pho chhuah a ni a, expo hi April ni 21,2022 thleng awh tur a ni.