Tuialhthei vang karah hriselna lam ngaih pawimawh
April ni 1 atangin tuialhthei phur lut an awm lo a, Mizoramah nasa taka nghawng neiin, petrol leh diesel a vang a, black market tak ngial pawh a awm lo chho nen, mitin min nghawng na hle. Sorkar lam nena buaina vang ni lovin, a phurtu lamah lungawi tawk lohna a awm vang a ni a, sorkar in theihtawp a chhuah hnuah kar liam ta tawp lam atang khan phurh luh leh ni tawh mahse, mamawh a la phuhruk zo tak tak chuang lo a, a ziaawm thuai erawh beisei a ni.
Lirthei hmanga eizawng leh lirthei hawlchhuak thei kan tam tawh hle tih a hriat a, nunphung tam tak a buai phah hle bawk. Hetiang hi kan tawng fo lovang tih a sawi theih loh a, ram thenkhatah nizung chakna leh electric hmanga lirthei siamchhuah awm tawh mah se, kan ramah erawh tuialhthei hmangtu kan la tam miau avangin kan nunphung hi thlak hret hret thiam a ngai tawh mai thei.
Mizoram IOCL Tranporters’ Forum (MITF) hruaitute chuan Zirtawpniah oil tanker 14 vel chu Mizoramah a rawn thlen thu an sawi a, a rawn la thlen belh zel dawn tih an sawi bakah tuialhtheia harsatna thleng hi a ziaawm chho zel tura an ngaih thu an sawi a ni. Hetiang hi kan dinhmun a la nih avangin ke a kal tam a, hriselna lam ngaihpawimawh phah nan hetiang hun thate hi hmang thei ila, loh theih loha lirthei ken a ngaih chang chu a awm ngei ang. Mahse, public transport leh ke a kal tam inhmuh nan hmang hlauh ila, hriselna lam ngaih pawimawh i ching thar zawk teh ang u.