Agriculture minister C Lalrinsanga’n hmun thenkhatah Custom hiring centre (CHC) hminga Tractor an pek lo hmang dik tawk lo deuh an awm nia sawi a awm thu sawiin, heng te hi enfiaha a tul anga hma- lak a nih tur thu a sawi.
E. Lungdar Tuipui zauva KVK Serchhip district-in Lentil Dal an enchhin (pilot project) nimina a hova an sengnaah he thu hi Agriculture minister chuan a sawi a. Tute emaw CHC hminga Tractor an pek mimal hminga Subsidy sum lo pea, mahni mimal ta anga chei zuia midang tana hman ve remchang lova siam an awm nia sawi a awm thu sawiin, heng mi te hi zawnchhuah an nih tur thu leh a tul anga an laka hmalak zui a nih tur thu a sawi a ni.
Tuipui Zauva lon- eitu ten Custom hiring centre hnuaia Tractor an dil chu a theih anga a lo ngaihtuahsak tur thu sawiin, C Lalrinsanga chuan Tuipui Zauvin Land development te, Irrigation te a mamawh hle tih a mit ngeia a hmuhpui thu leh a tul anga ngaihtuahsak zel a tum thu a sawi bawk.
C Lalrinsanga chuan KVK Serchhip district-in Lentil Dal chin dan lehkhabu (technical bulletin) an buatsaih pawh a tla- ngzarh nghal a. “Ka vei em em thin Dal seng hun duhawm tak kan hmang thei leh hlawk takin kan ram- ah kan thar thei a ni tih kan hmu hian min tilawm em em a” tiin, enchhin mai a la nih thu leh tam thama thar thei turin a chin dan chipchiar a bua ami chu lo hmang tangkai turin loneitute a ngen.
Agriculture minister chuan “Dal mai ni lo, Alu te pawh chin pun zel tumin hma kan laa, state dang atanga kan lakluh kan tharchhuah ve theih reng site thar- chhuah kawngah hma kan la chho zel dawn” a ti a. Loneituten him taka an thlaite an enkawl theih nan Bio control laboratory an din mek thu leh leitha lam pawh mamawh ang siam tura Bio Fertilizer Production Unit an din mek thu a sawi bawk a ni.