Aizawl: Hachhek bialtu MLA Lalrindika Ralte chuan Mizo \awng humhalh kawngah YMA-in nasa lehzuala hma a lak a ngai tih a sawi.
April 7-8, 2022 khan Thinghlun Branch YMA chuan Golden Jubilee an lawm a. Thinghlun Community Hall-ah jubilee lawmna vantlang inkhawm buatsaih a ni. He huna khuallian Lalrindika Ralte chuan YMA hlutzia sawiin, “Mizo hnam kan nihna nemnghettu chu kan \awng hi a ni a. YMA hi kan hnam anga pawl lian ber leh kan chhuan ber a nih angin \awng humhalhtu atan YMA-te hi kan \angkai thei ber bawk a ni. Mizo \awng humhalhna kawngah YMA-in nasa lehzuala hma kan lak a ngai a ni,” a ti.
Lalrindika Ralte hian Mizo mipa te an inngaihtuah chian a ngai tih sawiin, “He hnam himna leh dinchhuahna kawnga mawhphurtu chu mipa te hi kan ni. Mizo mipa kan nih chuan kan mawhphurhna kan hlen tur a ni,” a ti a. Mawhphruhna la ngam lo Mizo mipa an tam ta lutuk hi inenfiah a ngai nasa hle tih a sawi.
Mi rethei zawkte dawmkan a pawimawhzia thu sawiin Hachhek bialtu MLA hian, “Mizo hnamte hi rethei zawkte indawm kang a, nei lo zawkte chhawmdawl \hin kan ni. Mahse, mahni \anghma chiah kan hai ta niin a lang. Mahni chauh kan inngaihtuah a, hausa bik, thil ti thei bik kan awm a, rethei zawkte dawmkanna lam kan ngaihthah chuan kan ram leh hnam hi a him dawn chuang lo. Hetianga inhmangaih lo hnam kan nih chuan kan hmabak a eng dawn chuang lo,” a ti.
Lalrindika Ralte hian, vawiin nia dinhmun \ha a dingte hi kan ram leh hnam dinhmunah an lungawi a nih pawhin an him rei bik chuan loh tur thu a sawi a. “Entawn tur \ha Lal Isua kan nei chunga Kejriwal-te entawn kan ngai zawk tlatte hi a dik lo, a zahthlak. He hnam tana inpe tura kan penchhuah a ngai. He ram leh hnam tana thuk zawka inpe turin Zoram mipuite kan sawm a ni,” a ti bawk.
Thinghlun Branch YMA Golden Jubilee lawmna a hmanpui pah hian Lalrindika Ralte hian a biala khaw hrang hrangte a tlawh kual nghal bawk.