Bollywood star lar tak pahnih Ranbir Kapoor (39) leh Alia Bhatt (29) te chuan April 14, 2022 Ningani khan Mumbai-ah ‘Tiam tlat e’ an ti ta a, an pahnih hausakna belhkhawm hi Rs vaibelchhe 839 a tling.
Ranbir Kapoor hausakna
Report-a lan danin, Ranbir Kapoor hausakna belhkhawm hi Rs vaibelchhe 330 a tling a, film lar tak tak- Wake Up Sid, Raajneeti, Rocket Singh, Salesman of the Year, Rockstar, Yeh Jawani Hai Deewani, Barfi, Tamasha, Sanjau leh a dangte-ah hming chher khawpin a dingchhuak. Film lamah a hlawhtling a ni mai lova, film a chan dawna a fee lak pawh a tlem lo. Cheng vaibelchhe 50 a ni tlangpui.
Brand lian leh lar tak takah a hmel hmuh fo a ni a, commercial lam thilah pawh a mikhual lo. Sumdawnna lamah pawh a tal na viau a, investment hlawk leh lian tak takah sum a peipung reng bawk. A in leh lo, a chenna leh bungrua, lirthei leh a behbawm dang dang tiamin, Bollywood star zingah sawi hat hat a tling. Ranbir hian brand changkang leh hriathlawh- OPPO, TataAIG, Coca-Cola leh Oreo te hmel a pu zo hle a, brand pakhat a fakna ah hian engzat chiah nge a hlawha i rin le.. Cheng vaibelchhe 6 a ni daih!
Alia Bhatt hausakna
Milar Mahesh Bhatt leh Soni Razdan te fanu naupang zawk hi kum sawm liam ta khan ‘Student Of The Year’ film hmangin Bollywood a luh chilh a, hnung lam a hawi leh ngai tawh lo. He industry-a actress hlawh hnem ber zingah a invawrh nghal. Mak ang reng takin, actress zingah film hit tak tak a zawna vawrh chhuak nghal tuk tuk thei tlemte zingah a tel pha. Heti anga back to back hit nei thei hi kut zungtang thliah thlam an awm.
A hausakna belhkhawm Rs vaibelchhe 517 anga chhut niin, lemchan khawvela a talna la rei loh ang hu in, a sum dehchhuah a tam chak hle.
Brand lar tak tak- Aurelia, Cornetto, Lay’s, Frooti, Duroflex, Manyavar, Flipkart, Cadbury, Blenders Pride leh a dangah te a hmel kan hmu fo a, vawikhat fakna a shoot hian cheng vaibelchhe 2 a hawpui thin.
An hmachhawp
langsar te
Ranbir Kapoor hian YRF kutchhuak, ‘Shamshera’ ah actor dang Sanjay Dutt leh Vaani Kapoor te nen an inlan ho a, a nupui neih thar hlim hlawh Alia Bhatt nena an inlem vel hmuhnawm tak thlir theih a ni ang. Heng film ‘animal’ leh Luv Ranjan’ te pawh a lo chhuah thuai beisei a ni.
Kum 29 mi Alia Bhatt hian project hmachhawp beiseiawm a nei nual a, chung zingah chuan Jee Le Zaara, Darlings, Rocky Aur Rani Ki prem Kahani te pawh en a chakawm tawh.