Vadodara, Gujarat-a lirthei chetsualna tenau tak thleng chu buaina lian zawkah changin lunga intawng te, hmun thianghlim suasam leh lirthei tichhiat te a thleng zui tih police chuan Thawhtanni khan an sawi a, mi pathumin hliam an tuar bawk.
Police hian mi 19 an man tawh a, lirthei chetsualna hi Pathianni zan reia thleng a ni a. Two-wheeler chesuala tel mi pathum dang an man bawk.
Additional Commissioner of Police Chirag Koradia chuan a hnua buaina chhuak zuiah mi pathumin hliam an tuar tih a sawi.
Karelibaug police station-a thuneitu pakhat chuan Raopura venga two-wheeler pahnih intipalhna a thlen hnu hian hnam hnih an intibuai zui niin a sawi.
Chetsualna thlen hnuah hian hnam hnih hi inhawr khawmin Raopura veng thenawm, Karelibaug vengah lungin an intawng ta chiam a ni.
Pungkhawmte hian kawngpui sira hmun thianghlim an suasam a, autorickshaw pahnih leh two-wheeler eng emaw zat an tichhe bawk tih police hotu chuan a sawi.
Raopura leh Karelibaug police station-ah chetsualna thleng leh buai zuina avangin FIR ziah luh ve ve a ni.
“Mi 19 mante hi Karelibaug-a FIR thehluh hnuaia mite niin buaina chhuak avanga Pathianni zana beihpui thlaknaa man an ni a. Tute nge inrawlh dang, la hriat chiah lohte pawh zawn zel an ni,” tiin Koradia chuan a sawi.
Raopura-a FIR thehluhah mi pariat atanga 10 vel hming tar lan niin hei hi lirtheia chetsualna kaihhnawih bik a ni a, mi pathum man an ni tawh.
Venhimna nasa taka tihkhauh nghal niin boruak tha lo inmung zui a awm rih lo niin a sawi.
“State Reserve Police (SRP) company hnih tirh luh an ni a, patrolling neih reng a ni bawk a, boruak thunun a ni,” a ti.