Auto Corner
Thansanga and Sons Auto Division, Ramhlun North, Aizawl chuan thawhtanni atangin Mizo thalaite bike ngainat MT-15 Version 2 an hralh chhuak.
Showroom thuam thain changkang leh mawi zawkin an duang a, ‘Blue Square showroom’ an neih hnua lirthei thar an phochhuah hmasak ber a ni. Mi 93-in an hauh lawk a; semiconductor (chip) harsatna avangin Mizorama Yamaha two-wheeler dealer hian 20 chauh an dawng a ni.
March 23, 2019 khan Mizoramah Yamaha MT-15 Version 1 tlangzarh a ni a, company-in V2 a tihchhuah hmain kum thum chuang hret an kalpui. Hetih chhung hian India rama Yamaha two-wheeler dealer zingah Thansanga and Sons Auto Division-in MT-15 V1 a hralh hnem ber.
A chhuak thar V2 hi a hmaa mi nen a pianhmang leh ruangam inang deuh reng mah se chi hrang hrangin thuam that a ni a, USD fork vuah a nih bakah swing arm thar, bluetooth thlun zawm theihna speedo metre bakah rawng chi thar pahnih a awm belh.
A rawng azirin Mizoramah Rs 1,81,461 leh Rs 1,80,421-in an hralh a, MT-15 V1 an hlawhtlinpui tawh avangin V2 hi an duh ang an dawng thei a nih chuan hralh kal hle turah an ngai a ni.
Thansanga and Sons Auto Division neitu Robert Lalremruata chuan India rama dealer zingah Yamaha MT-15 hralh tam ber an nih bakah, R-15 hralh hnem pathumna an ni phak tih a sawi a, chutih rualin kum hnih kal ta atangin chip harsatna avangin ‘bike an dawng tha thei lo nasa a’ lei duh tan nghah rei a ngaih phah hle tih a sawi.
Robert-a chuan : “Nikum atang phei kha chuan lirthei chhuak thar kan tlangzarh ngam tawh lo va, a chhan chu kan duh ang kan lak theih loh avangin lei duhte hnenah kan pe thei lo va, a hrehawm hle a ni,” a ti.
Nikum October khan Mizoram dealer hian Yamaha R-15 V4 tlangzarhin tun thlengin hauh lawk 200 vel an la awm reng a; a hnuah scooter chhuak thar Aerox 155 tlangzarh ngam lovin an hmuh ang an pe chhuak zel a, a tir atanga tun thlengin mi 400 atanga 200 vel hauh lawk an awm reng a ni.