Supply Minister K Lalrinliana chuan Mizoram mipuiten fur laia harsatna an tawh loh nan tunah hian buhfai chhekkhawl zaa 80 zawh tawh a nih thu a sawi.
Rengdil leh Tuidam khuaah nimin khan K Lalrinliana hian supply department kudam leh a kaihhnawih building a hawng a. Hawnna inkhawmah thu sawiin, supply department-in Mizoram mipuiten ei leh ina harsatna an tawh loh nan nasa takin hna an thawk tih a sawi a. Buhfai pawh monsoon stock tih thin a nih thu sawiin, monsoon stock hi zaa 80 tunah hian zawh tawh a nih thu a sawi.
Supply minister hian Mizoramin gas bottling plan lian zawk a neih theihna tura hmalak mek a nih thu te, oil chhek khawlna (oil depot) neih theih nana hmalak mek a nih thu pawh sawiin, tun sorkarah kudam 19 sak zawh tawh a nih thu te, kudam 21 sak mek pawh zawh kim thawkhat a nih thu leh a dang 31 sak lehna tur pawh buaipui mek a nih thu a sawi bawk.
Ram intodelh theihna turin sorkarin kawng hrang hranga hma a lak thu leh SEDP hmanga Zoram mipuiten eizawnna ngelnghet nei a, hmasawnna kawng an zawh theih nan sorkarin harsatna hrang hrang karah hma a la mek tih sawiin, “Heng kan supply kudamah hian kan ram thar chhuah ngei kan dah theihna turin intodelhna kawng dik SEDP hnuaiah mipuiten kan zawh a, tan kan lak a ngai a ni,” K Lalrinliana’n a ti.
Rengdil leh Tuidam-a hawn tak kudam building thar te hi NABARD sum hmang a sak niin, ‘Construction of 21 warehouses and its related infrastucture’ project hnuaia sak a ni a. Heng khaw pahniha kudamah hian quintal 2,500 leng thei tura zaua sak a ni a. Cheng nuai 159 ve ve sengin thla 15 chhungin Babie Construction & Consultancy Services te’n an sa zo a ni.
Azadi ka Amrit Mahotsav lawmna kal zelah supply department pawhin PM-GKAY Scheme kaltlangin AAY leh PHH chhungkuaten an ration quota pangngai bakah thla khatah buhfai kg 5 a thlawnin an dawng thin a ni.