Zothan Autoworks Pro Volleyball League inkhel hmasa berah championship hnuhnung ber final-a insu Chhinga Veng Spikers leh Durtlang North, hmeichhe lamah Durtlang v Bungkawn an intawng dawn.
Ningani khan Hawla Indoor Stadium Coference Room-ah Mizoram Volleyball Association President Er. H Lalzirliana, MLA chuan handbook leh fixture a tlangzarh a, Covid-19 leng vanga kum hnih thulh zawn a nih hnua Pro Volleyball khelh a ni leh tur chu thil lawmawm a nih thu a sawi.
May 6, Zirtawpni zanah R Dengthuama Indoor Stadium, Mualpuiah Pro Volleyball vawi ngana tan a ni dawn a, dar 8 atangin Chhinga Veng leh Durtlang North an inkhel ang.
Volleyball inelna sang a nghahhlelhawm
2019 final-ah Durtlang North-in set hmasa pahnih an lak hnuin harsatna an tawk a, Spikers-in pawtthla in a tawpah 3-2-in an chak a, a vawi khat nan an champion. Kum thum chhunga Pro Volleyball inkhel awm leh hmasa berah Durtlang North-in an tlawmna chhang let nghal an tum dawn a ni.
Inrinni zanah vawi khat aia tam champion thei awm chhun Hunthar leh Tuichangral an inkhel dawn a, Thawhtanni zanah team panga an inlan kim ang a, TNT-in champion lai Chhinga Veng an hmachhawn ang.
May 10, Thawhlehniah hmeichhe league tan a ni dawn a, team tel pali inlan kim nghal vekin 2019 final-a intawng Durtlang leh Bungkawnin tlai dar 3 atangin an khel dawn a, zan dar 8-ah Bethlehem Vengthlang leh Kanan an inkhel ve leh ang.
Kum thum kal ta khan rin hlawh zawk ni chungin a vawrtawpah Bungkawn an tlawm a, an khelh leh hmasak berah tawrhna thawi dam theihna hun tha an nei a, chutihrualin Durtlang tan title humhim turin fiahna pawimawh a ni nghal ang.
MVA President chuan, “Kum nga chhungin Mizoram volleyball-in India aiawh thei player neih ngei a la tum fan a, Pro Volleyball-in a hlawhtlin theihna kawng a hawn ngei ka beisei.”
“Covid-19 leng vangin hun khirh takin MVA a tlakbuak a, kan tum ang a hlawhtling mai thei rih lo. Mahse, tun hnai maiah hlawhtling takin Hnahthialah Inter District Volleyball Championship buatsaih a ni a, tunah Mizorama inelna sang ber khelh a ni leh dawn a, hma kan la chhunzawm zel dawn a ni.” a ti.
Pro Volleyball League hi R Dengthuama Indoor Stadium-ah vek khelh a ni dawn a. May 27-ah final tur niin inkhel vawi 20 (mipa tum 13 leh hmeichhia vawi sarih) a awm dawn a, LPS Vision-in live telecast-in a pe chhuak vek ang.