Sterling-a’n England pawna inkhelh a chak

Manchester City forward Raheem Sterling chuan inkhelhna hmun a chang tam lo a nih chuan club chhuahsan mai a hreh lova, ram dang club tana inkhel turin a inhawng. England international hian Etihad Stadium-ah kum 2023 thleng contract a nei mek a. Kum naupang tak a nih atangin England pawna innkhelh chu a chak thin tih a sawi.

Kum 2015 a Liverpool atanga Pound maktaduai 50 a City in an lakluh Sterling hian Etihad Stadium-ah hian kum ruk hun a hmang tawh a. Pep Guardiola pawlten Premier League title vawi thum an chawina kawnga mi tangkai ni thin mahse kuminah khelhna hmun a chang tam lova, hei vang hian kum thar lama insawn a hreh lo.

Sterling hian tun season-ah Premier League-ah vawi hnih chiah inkhel bul a la tan a, Champions League group stage a Paris St-Germain an hneh loh tumin bul a tan leh bawk. England tana a khelhpui Jack Grealish an lakluh hnuah khelhna hmun inchuhna a sang zual a. Striker position-ah right winger Ferran Torres chuan rin a hlawh zawk bawk avangin chhawr a hlawh lo.

Sterling chuan, “Inkhelh tam zawkna tura ka kal theihna hi a awm chuan ngun taka ngaihtuah turin ka inhawng. Ka sawi fo thin angin football hi ka ngaih pawimawh ber chu a ni.”
“Naupang ka nihlai atangin chona hmachhawn a, hlawhtlin duhna nasa tak ka nei. English mi ka nih angin Premier League hi kan suangtuah thin lian ber a ni a, chutihrualin ram dang a inkhelh a, chona thar han hmachhawn te hi ngaihtuahnaah chuan a awm thin.” a ti.

Kum 26 mi hian inkhelh tam lohin a rilru a nghawng dan zawhna chhangin, “Phunnawi duh ngai lo mi ka ni a, hei vang hian thil lian tham tak nia ngaih theih tura thil lantir hi ka duh lo. Ka tih tur hlen a, inkhel tura inpeih reng hi ka mawhphurhna a ni. Ka tum ber chu inkhelh tam a, goal khung tam a ni.” tiin a sawi.

February thla atanga Manchester City in inelna hrang hranga match 33 an khelh zinga vawi 16 chiah bul tan tir Sterling hi Spanish club Barcelona nen sawizawm an ni a, mahse sum nei lo club in loan bak an tlin dawn lo.
Real Madrid leh Premier League lamah Arsenal leh hausa thar Newcastle United te pawh sawi rik an ni bawk.

Leave a Reply

Your email address will not be published. Required fields are marked *

error: Content is protected !!