Assam-a eptu, Congress Working President Kamalakhya Dey Purkayastha chuan tun hnaia Durga Puja laia Bangladesh-a Hindu mite laka tharum thawhna thleng leh thi an awm nual chungchang chu United Nations-ah ziakin a thlen.
Bangladesh chhim lam, Comilla district-a Durga Puja lawmna pandal-ah Muslim sakhaw lehkhabu thianghlim, Quran tihbawrhban anga social media-a tar lan atanga buaina chhuak hi a thlen.
Karimganj district-a MLA hian UN-a Human Rights Council branch hnenah thil thleng chu ngaihven turin a ngen a. North Karimganj bialtu MLA hian Bangladesh Prime Minister Sheikh Hasina hnenah pawh lehkha hi thawnin pawikhawihtute chu hrem ngei tura a phut thu a sawi.
UN-a lehkha a thawnah hian Purkayastha chuan, “Bangladesh-ah hian rawng taka chetna a thleng a, Durga Puja lawmna pandal-ah insuasamna a nasa a, chanchinbua tar lanah Durga lim chauh khawih ni lovin a betute pawh kut an thlak tih a lang a. Hei hi India pawhin ngaihvenin thenawm rama thil thleng hian mi pawh a tithinrim a ni,” a ti.
Bangladesh-a sakhaw tlem zawkte laka kutthlak hian ram dangah pawh a tlem zawkte khawih mai duhna a thlen a hlauh thu a ziak bawk.
Hindustan Times chanchinbu hnenah Kamalakhya chuan, “Bangladesh-ah chuan Hindu hi an tlem a; mahse, Muslim hi ram dangah a tlem zawk an ni ve tho va. Bangladesh-a a tam zawkin a tlem zawk an tiduhdah a nih chuan, ram danga an tlem zawknaah hian Muslim hian an tuar thei a. Bangladesh hian tha taka a kalpui ngei a tul a ni,” a ti.
Kamalakhya Dey Purkayastha-a bial awmna, Karimganj district hi Bangladesh nen ramri thui tak an intawm a, mipui pawh awlsam takin an inkalpawh reng a, an nunphung pawh inanna tam tak an nei a. Bangladesh prime minister hnena lehkha a thawnah hian India miten Bangladesh-a sakhaw zuitu tlem zawkte tawrhna an hmuh dante pawh a ziak lang.
Amah hi tun hma atang tawha hetiang thil sawi chhuak zing tak niin state leh sorkar laipui pawh bei fo tawh thin a ni a. Bangladesh-a thil thleng pawh hi Prime Minister Modi hnenah pawh ngaihven tura ngenna a thawn.
Bangladesh thenawm, Barak Valley-a chengte pawhin he thil thleng hi an dem thu an sawi hlawm.
Cachar district-a Hindu Chatra Sangha pawhin Prime Minister Narendra Modi, Bangladesh prime minister, external affairs ministry leh Bangladesh foreign affairs ministry-ah pawh lehkha thawnin an rama Hindu awmte himna ngaihsak tha turin a ngen a. An chenna in leh nunna chante pawh zangnadawmna pe ngei turin a phut thu a thlen.