Ditrict tina RT-PCR bun a tul ber kher lo mai thei by Vanneihthanga

Ditrict tina RT-PCR bun a tul ber kher lo mai thei

  • Vanneihthanga

Mizoram population atanga thlirin, “District tinah RT-PCR Laboratory din tur” tih ngawt maite hi chu GOI in a sawina context hi kan ngaihtuah tel ve chu a ngai a ni.
India ram state tam takah hian Mizoram population aia tam mihring awmna District hi 440 chuang a awm. Mizorama kan District thenkhat, mipui nuai khat awrh awmnate phei hi chu District ni thei turah pawh anni chuan an suangtuah phak lo hial ang.
Kan tih luatah kan zuam sual thei ve tho tih kan hriat tel a tha ang. Kan enkawl zawh loh thil tha pui pui neih teuh hi a tul ber lo mai thei. Lunglei, Kolasib leh Champhaiah te dah ila a awm viau. District capital zawng zawnga dah kher hi kan mamawh ber lo maithei a nia.
Heng district capital, mihring tamna hoah hian RTPCR chu dah ila, Truenat Lab (Mini PCR ti a sawi bawk) te hi tun aia tangkaiin hmang bawk ta ila. A tul angin thuam changtlung ta ila, kan tan chuan tha zawk mai thei.
District tina RTPCR Lab din hi kan tan phurrit a ni ang tih a hlauhawm. RT-PCR hi Microbiologist pakhat talin a enkawl a ngai. Health Deptt. hotute ngaihdan thenkhatah chuan, District tina kan dah chuan, vai/hnamdang microbiologist kan chah luh belh a ngai dawn a ni.
RTPCR hi tuna khawl hmuh theih tha ber nia ngaih a ni rih a. ZMC lab chauh kan nei hi a fuh mawlh lova, tun aia indaih zawka hman tur bun belh hi kan mamawh. A harsatzia in sermon khum reng ringawt kha mipuiin kan pawm lo a ni ber mai.
Chutih rual erawh chuan, mipui an phun nasa tih avanga, kan tana phurrit tling tur khawpa, kan enkawl sen loh tur bun chiam pawh chu a finthlak ber chuang lo tihna a nih ber hmel e.

Leave a Reply

Your email address will not be published. Required fields are marked *

error: Content is protected !!