India chuan ram dangte nen thla tharah hian Afghanistan chungchang sawihova intawhkhawmna a thleng mai thei a, Pakistan leh China pawh sawm an ni dawn.
National security advisor-level-a inbiakna tur hi hetiang lam chi a vawi khatna tur niin New Delhi-a nghal tura ruahman a nih thu ANI chuan a tar lang.
Russia, Tajikistan leh Uzbekistan pawh an telna tur sawihona hi November 10 leh 11-a neih tura ruahman chhin a ni a. Inbiakna hi Asia chhim lam ramten kum 2019-a Iran-a regional security conference an neih anga kalpui tura ruahman a ni tih tar lan a ni bawk.
He sawihona turah hian India hmelma anga sawi theih, Pakistan leh China pawh tel tura sawm an ni dawn nia sawi a ni.
ANI chuan Pakistan NSA Moeed Yusuf pawh tel tura sawm a ni tih a tar lang a; mahse, sorkar atanga finfiahna erawh a la awm lo.
Conference hi Taliban kuta Afghanistan a awm hmaa neih tura ruahmanna awm tawh anga tar lan a ni a. New Delhi hian a hmain Afghanistan dinhmun sawia a thenawm ramte intawh khawm hi a ruahman tawh a; mahse, hripui vangin ruahman angin thil a kal thei lo va, Afghanistan sorkar chu Taliban-in an la zui ta bawk.
Pakistan hian NSA-level conference hi a chhim a nih chuan NSA Yusuf-an India a tlawh hmasak ber tur a ni ang.
Hetih rual hian a tel ngei dawn em hriat a ni lo va, Pakistan hian Afghanistan chungchang sawiho tura tuna roreltu, Taliban tel miah lohna chu a hmanpui duh dawn em hriat a ni lo.
New Delhi-in Afghanistan chungchang sawihona a thlen turah hian he rama roreltu, Taliban aiawh sawm an ni lo nia sawi a ni.
India hian khawvelin Taliban mihring dikna chanvo a palzut nasat thin avang leh he rama roreltua khawvelin a la pawm loh avangin a la sawm lo nia ngaih a ni.
Afghanistan-a Taliban-in ro an relna pawm chungchangah hian India hi a tawng tam duh lo va, Afghan mipuite thatna tur an duh ber tih an sawi.
Prime Minister Narendra Modi-a pawhin ram dangte chu Afghan-te chu ngaihvena an ram chu firfiakte leh mahni duh chawivawngtutute than len nana siam lo turin a ngen.
India hian August 31 khan Taliban hi a lo be tawh.