ZPM party-in Mizoram State Agriculture/Horticulture/Forestry & Marketing Cooperative Federation Ltd. (MAHFED) hmalak dan leh sum hman danah thil felhlel tam tak a awm nia a lan thu an sawi a. “A changtu minister C Lalrinsanga’n a haider nge, a hriatpui lo,” tia zawtin, thil felhlelte a rang lama enfelpui tura an phut thu an sawi.
MAHFED hmalakna chungchanga RTI hmanga zawhna chhannaa a lan danin thil fel lo tam tak a awm tih hmuh a nih thu ZPM chuan an sawi a. Tribal affairs ministry atanga Institutional Support for Development & Marketing of Tribal Product/Produce Scheme Rs 6,96,00,000 a dawn thu sawiin he scheme atang hian thawktu hlawh leh allowance atan Rs 51,50,635 an hman thu an sawi.
He sum hmanna hrang hrang enin thil fel lo a lang nual nia sawiin, ZPM chuan Bairabi-ah warehouse Rs nuai 274 senna tur sak tum mek a nih thu leh hei pawh hi enchian ngai tak a nih thu an sawi a. Bultan tak tak a nih hmaa hmalakna tihtawp riha en that leh an rawt.
He pawl hian anmahni dan siam ‘bye laws’ leh MCS rules kalhin Rs 195,00,000 chu member ni lo hnenah a pung awmin a puktir niin ZPM chuan an sawi a. He sum puktir tura inrawnkhawm dan te, meeting thuchhuakte chu federation tih atana mawi lo leh awm lo tak nia sawiin, thuneihna hman dik lohna niin an sawi.
MAHFED chairman hman tur motor (Bolero) lei danah pawh dan kalha chetna a awm nia sawiin, “Chairman-in a thuneihna hmangin a lei tawp a ni ber,” tiin, Rs 10,35,768 lai hman a nih thu an sawi.
ZPM chuan, “Audit report report-a a lan danin he pawl hian mi mal senso thlengin a rulhsak thin tih hriatchhuah a ni,” an ti a. Tribal affairs ministry atanga an sum hmuh hmanna chungchangah society-te tana seminar–cum-training buatsaihna senso phei chu auditor-ten pawm tlakah an ngai lo hial niin an sawi.
Board of Director (BoD) meeting vawi sarih neihna senso Rs 1,01,419 te, BoD member honorarium atana Rs 1,82,000 sen leh chairman leh vice chairman honararium atana Rs 2,47,618 sen a nite chu enchian ngai nia a lan thu ZPM chuan an sawi bawk.