MNF candidate thlan tlin chuan zawngchhang dawn


MNF adviser leh health minister ni bawk, Dr R Lalthangliana chuan Tuirial bial MLA bye-election-ah an party candidate thlan tlin a nih chuan inthlanpui lo awm leh turah pawh an zawngchhang ngei tur thu a sawi.
Inrinni khan Tuirial bial bye-election atana campaign-in Thingdawl, Bualpui, Kawnpui, Khamrangah leh Mualkhang te a tlawh a. Heng hmunah hian thu sawiin MNF adviser hian Tuirial bial hi ruling bial a nih chuan a hlut bikna an hmuh ngei a rin thu a sawi.
“Kan candidate hi in tihtlin chuan inthlanpui lo awm leh turah pawh in titling leh duh nghal nghei ang a, in zawngchhang ngei ngei ang,” a ti.
Dr R Lalthangliana hian, “Kan tlin lohna bial Serchhipah khan ka department, health-ah pawh oxygen plant lianpui prime minister nen inthlunzawmin ka hawng a, commerce-ah pawh market lian tak an sa zo a, department dangah pawh hma kan la mar reng tho a, hmanni lawkah kan chief minister zahawm tak pawhin district danga awm lo, paragliding chu Serchhipah a hawng tawh bawk a, a pangngaiin a la kal reng,” tiin, mi thenkhatin ‘Serchhipah pawh an tiam ang an ti lo’ an lo tih fo hi thu dik lo a nih thu a sawi.
Tuirial bialah party thenkhat campaign auhlaah health care chhungkaw khat tan cheng nuai hnih ni thin, cheng nuai khatah a tlahniam tawh em ni, tia zawhna chu Dr. Thangtea chuan, “A la pangngai reng a, cheng nuai hnih a la ni reng e,” tiin a chhang.
“Kum hnih tha hun kan la nei a, Covid hi kiam zel turah ngai ila, a lo la awm deuh a nih pawhin a hma ang em em khan pawisa hmanna tur a awm tawh lo ang a, budget hmasaa SEDP kan dah kha chu beisei lawk hauh loh Covid-19-ah hman a ngai a, budget tharah hi chuan kan chief minister zahawm takte nen pawh kan sawi tawh a, pawisa kan dah ang a, hma kan la thei tak tak tawh dawn a ni,” Dr. R Lalthangliana’n a ti bawk.

Leave a Reply

Your email address will not be published. Required fields are marked *

error: Content is protected !!