Tuirial bial MLA bye-election neih turah Election Model Code of Conduct kalha party hrang hrangte an campaign nia hriat a nih avangin MPF-in hma la turin thuneitute a ngen dawn.
Hemi chungchanga thuchhuah an siamah Mizoram People’s Forum (MPF) General Headquarter chuan Tuirial bial bye-election neih turah inthlanna felfai leh thianghlim a awm theihna turin theihtawpin hma an la tih sawiin, party tin candidate-te pawh an kawm tawh tih leh MPF leh political party-ten thawhhona thuthlung an lo siam tawh inhrilh thar lehna an nei tawh tih an sawi.
Hetih laia party hrang hrangten campaign an kal pui danah ECI-in Model Code of Conduct a siam leh MPF leh party te thawhhona thuthlungte kalha hmalak a awm chu pawi an tih thu an sawi.
MPF thuchhuah chuan TV special report leh video clip hrang hrang atanga a lan danin sum leh therhlo hmanga vote zawn te, buh inphurhsak te, a thlawna ration buhfai sem te leh JCB hmanga lei laihsakte leh ruai thehte a awm nia hriat a nih thu sawiin, hetiang hi ECI Model Code of Conduct-in a phal loh leh party-te nena thawhhona thuthlung kalh a nih avangin MPF-in thuneitute hnenah hma la turin thlen a tum tih an sawi.
MPF thuchhuah chuan thianghlim taka campaign kalpui turin candidate-te leh party worker-te a ngen a, Tuirial bial mipuite pawh candidate-te tihautak lo zawng leh thawhhona thuthlung pel zawnga beisei nei lo turin an ngen.
Bial chhung khaw tina MPF Local Forum leh constituency forum te pawh theihtawp chhuaha thawhhona thuthlung hre renga vil tur leh mitmei reng turin an ngen tih MPF General Headquarters thuchhuah chuan a tar lang bawk.