Myanmar tual chhung buaina tlansanin Mizoramah tlan lut an pung zel a, raltlan luh tamna Tuipuiral huam chhunga raltlante chuan buhfai ei tur an tlachham tan.
Tuipuiral Group YMA hruaitute hnen atanga The Zozam Times thudawn danin, tun hnaiah Chin state-a inkahna a thleng leh a, Myanmar sipaite hian beihpui thlak zelin Farkawn khaw chhak lawka Chin National Army Camp pawh beih an tum niin thuthang a awm a, hengte avang hian Tuipuiral huam chhungah raltlan an luh belh leh nual a; tun hnai ni li chhungin raltlan mi 187 an luh belh.
Raltlan luh tamna Tuipuiral huam chhungah khaw 21-ah nimin thleng khan raltlan 2,627 an awm mek tih Tuipuiral Group YMA hruaituten an sawi a, raltlan an thathnem chhoh zel lai hian mi tlawmngaiten buhfai an thawhkhawm erawh a tlem chho hle tawh tih leh buhfai ei tur an tlachham tan chho tih an sawi.
Tuipuiral Group YMA hruaitute chuan, “Tuipuiral khaw hrang hrang leh Mizoram hmun hrang hrang atangin tanpuina an dawng thin a, buhfai pawh thahnem tak kan dawng a; mahse, raltlan an luh belh zel a, relief camp-ah awm an thathnem em avangin ei leh in a lo hau tak a, tunah hian relief camp tinin buhfai kawl lai an nei tlem tawh a, a mangang thlak tana kan bialtu MLA pawh hma la turin kan ngen,” an ti.
Raltlante mamawh tlakchham an neih dang sawiin, “An sahimna zawnga rawn tlan lutte hi mut bu pawh rawn keng lote an ni hlawm a, tunah hian mut bu nei mang lo an awm nual tawh,” an ti a, mi tlawmngaite mutbu leh thawhmhnawte raltlante tan pe khawm thin mah se luh belh an awm zel avangin an dawn khawm sa chu a mamawhte pek zawh nghal zel a nih thu an sawi.
Champhai sub headquarter YMA chhinchhiah danin, Champhai khawpui chhungah raltlan mi 3,000 chuang an awm mek a, Hnahlan tlangdungah pawh raltlan mi 50 bawr vel an awm mek a, hriat theih chinah Champhai district chhungah raltlan 6,000 vel an awm mek a ni.
Myanmar sipaiten khaw hrang hrang an run chhoh zel avangin Mizorama tlan lut hi an la awm belh zel dawn niin a lang a. Thudawn danin, inrinni khan Farawn, Myanmar-a khawtlang hruaituten Farkawn VC-te an hmu a, Farawn khaw mite sipai hlaua tlanchhiat a ngaih thulhah Farkawna tlan luh an tum thu leh an awmna tur lo ngaihtuahsak turin an VC-te hi an ngen.
Hnahthial district chhungah pawh raltlan lut an pung zel a, tun dinhmunah mi 2,235 awm tawhin heng zingah hian chhungkua 390 an awm a. Lawngtlai district chhungah pawh raltlan 2,951 an awm a, heng zinga 626 chu Lawngtlai khawpui chhunga awm a ni a, a bak mi dangte chu Sangau, Niawhtlang, Pangkhua leh Saikahah te an awm mek a ni.