Myanmar atanga Mizoram kaltlanga dan loa kuhva rah tawlh sorkarin ngaimawh chungin kuhva rah tawlh ru an la tam zel a, kumin chhungin Champhai police-ten dan loa lak luh kuhva rah Rs vbc 168 hu an man tawh.
Dan loa Myanmar atanga kuhva lakluh hian thil tha lo tam tak a hrin chhuah avangin nikum kum tawp lam khan Champhai district chhunga check gate-te chu kuhva phur lirthei tan khar a lo ni tawh a, Champhai bawrhsapin khapna thupek a lo chhuah fo tawh a, heti chung hian kuhva tawlh erawh a tawp thei lo.
Myanmar atanga dan loa phurh luh kuhva rah hi Champhai police, custom leh Assam Rifles-ten kumin chhungin thahnem tak an man tawh a. Champhai police hotuten The Zozam Times an hrilh danin, police bikin January atanga October 12 thleng khan kuhva rah kg 82,190 an man tawh a, heng kuhva rah an man te hi Rs 1,68,41,000 man hu a ni.
Kuhva rah tawlh luh chungchangah hian tun thla ni 14 khan Champhai bawrhsap bawkin thupek a tichhuak leh a, dan loa kuhva rah phur lirtheite avanga Champhai district chhunga kawng siam tharte a chhiat chak avangin kuhva phur lirtheite thla hnih chhung tlan a khap.
Champhai bawrhsapin khapna thupek a chhuah bawhchhiate thlithlaia hma la tura a ngen angin he district chhung khaw thenkhata village council-te chu dan bawhchhiate vil turin kawngpui an an duty thin.
Khawbung atanga thu dawn danin bawrhsapin thupek a chhuah hnu hian Khawbung leh Biate tuipui kawng kaltlanga kuhva tawlh thin lirthei tlan an awm mang tawh rih lo a ni.
Hetihlai hian Kolasib leh Vairengte khaw chhungah kuhva ro dahkhawmna kudam 70 vel a awm a, kudam neitute zingah hian hnam dangte pawh an awm a, kuhva rahte hi Myanmar atanga lakluh niin, state pawnah an hralh chhuak thin.
Kuhva rah kudam neitute hian Myanmar atanga kuhva rah an lakna kalkawnga police checkgate awmah pawisa an chawi thin thu an sawi niin Vairengte atanga thudawnna chuan a sawi bawk.