Nov. 3-ah Zoramthanga thu-buai thutlukna puan hun sawn


Chief Minister Zoramthanga eirua puhna thubuai chungchanga court thutlukna nimina puan tura tih chu Tuirial bial bye-election-a vote tlate chhiar zawh hnu November 3-a puan turin sawn a ni.
Zoramthanga eirua puhna thubuai hi Court of Special – Judge (Prevention of Corruption Act)-in a ngaihtuah a, court thuremna puan hun sawn a nih chungchanga order a tihchhuahah eiruka inpuhna thubuai chungchanga court thutlukna chu peih fel vek a ni tawh tih leh thuremna puan hun hi sawn ni mah se thutlukna hi tihdanglam theih a ni tawh lo tih a tar lang.
Court chuan, “Zoramthanga thubuai chungchanga thutlukna puan hun atan October 18 chu ruahman lawk ni mah se Tuirial bial MLA bye-election neih hun a hnaih tawh avangin thutlukna puan hun chu sawn tha zawka ngaih a ni,” a ti a, Zoramthanga chu political party-a nihna sang tak nei, ram hruaitu lu a nih avangin puh a nihnaah hian eng zawng pawha thuremna kalpui a nih chuan bye-election neih turah nghawng a neih theih avangin thuremna puan hun sawn chu tha zawka ngaiin thutlukna siam a ni tih a tar lang.
November 3-a court thuthlukna puan niah hian thubuai neitu, Zoramthanga chu court-a inlan ngei turin court chuan nimin khan a hriattir nghal.
Tar lan tawh thin angin, Zoramthanga hi a sum lakluh leh thil neih inmil lo leh Sihphir rama Aii puka a huana sorkar bungrua dik lo taka hmanga puh a ni a, PRISM chuan eiru ngeia ngaiin Anti-Corruption Bureau (ACB)-ah thubuai an thehlut a, ACB chuan chhui zui tlakah ngaiin kum 2010 September ni 15 khan thubuai a ziak lut a ni.

Leave a Reply

Your email address will not be published. Required fields are marked *

error: Content is protected !!