Arsenal club ‘legend’ Patrick Vieira chuan a team in hnehna chang tur dinhmuna an dinlaia goal an chhuah chu pawm a har tiin inkhel zawhah a sawi a. A club hlui leh tuna a enkawl lai Crystal Palace te 2-2 in an inhnehtawk.
Thawhtanni zan Premier League inkhelah Arsenal in huntawp dawn tawhah Alexandre Lacazette hmangin goal an khung a. Emirates Stadium-ah Vieira-a’n a club hlui a barakhaih thei lo.
Palace an chak teuh
Tunhnaia result tha an neih zawn avanga inrintawkna nena inkhel Gunners an kheltha a, first half-ah Pierre-Emerick Aubameyang hmangin goal an khung thuai a. He goal luh nan hian Nicolas Pepe pawh a tangkai.
Goal an chhuah hnuah erawh Palace an kang a, Gunners an tlahniam thung. Arsenal laka record nei tha thin striker Christian Benteke chuan minute 50-naah an si phurh a sut a. Thomas Partey-a ball hloh chu Jordan Ayew-a’n Benteke khung turin a siamsak.
Palace bawkin minute 73-naah Arsenal ball hloh atangin goal an khung a. Midfielder Albert Sambi Lokonga ball chan chu Palace muallai a mi pawimawh Conor Gallagher chuan chhuhsakin striker Odsonne Edouard chuan goal-ah a khung.
Kieran Tierney-a’n Gunners tan goal bar a pet per a, Arsenal in an si phurh sutna hun an hloh tawh nia a lan hnuah substitute Lacazette chuan danglamna a siam.
Inkhel zawh lam
Crystal Palace boss Patrick Vieira an chak zo lo chu a ui thu a zep lo. “A tawpa goal chhuah hi a na a, a bikin player te an kheltha a, rim taka an thawh avangin point thum hmuh an phu. He result hi pawm a har a, pawi ka tihpui tak zet.” a ti a.
“Khelmual chhunga kan chetdanah ka lung a awi a, kan theihna pholang tur khan kan zam miah lo. Second half bikah phei chuan anni lam kha kan hlau miah lova, ball pawh kan chhuhsak ngun hle. Hei hi kan team inkhela tam tura kan duh a ni a, huaisen zawka hetianga kan khelh zelna turin kan inzir belh dawn. Crystal Palace football a bet tlat turin kan duh.” tiin a sawi a.
Goal khungtu Benteke fakin, “Christian hi a thawkrim a, goal khung thiam a ni. Tunhnaia goal hmaah a vanduai avangin inrintawkna neih a harsa deuh a, hei vang hian goal a khung hi ka lawmpui hle.” tiin a sawi.
Arsenal boss Mikel Arteta chuan, “Inkhel danglam tak a niin ka hria. Bul kan tan tha a, kan thunun zawk a, goal pawh kan khung. Khami hnu lam atang erawh kan talbuai ringawt a, ball kha kan inpe kual mumal hleithei lova, anni lamin remchangah la in kan inremdan leh kan tlarhnungah a awl lai a tam nan min pawt darh ta viau thin.” tiin inkhel a thlirlet.