Tuirial bial MLA bye-election neih turah campaign boruak a sang zel a, Election Model Code of Conduct bawhchhia an awm loh nana thlithlaituten khaw hrang hrangah vantlang hmuna party chhinchhiahna banner leh flag intarte an la thla.
Kawnpui atanga thudawn danin, October 30-a MLA bye-election neih turah hian campaign boruak a sang hle tawh a, party hrang hrangin danin a phal lohte bawhchhiain, vantlang leh lirtheiah flag tar hmuh tur a tam hle.
Election Model Code of Conduct bawchhia an awm leh awm loh thlithlaitu Flying Squad Team-ten Tuirial bial chhung khaw hrang hranga party office-te an lo tlawh chhuak tawh a, party mite chu Model Code of Conduct bawhchhiat theihna thil hrang hrang an lo hrilhfiah tawh thin.
Nimin khan Flying Squad Team-ten Kawnpui, Bualpui leh Thingdawl te tlawhin, vantlang hmuna flag leh banner intarte an lak thlaksak a, hengte hi candidate expenditure-ah ziah luh turin siam fel a ni dawn.
Static Surveillance Team-te pawh campaign office-ah kal kualin Model Code of Conduct an hrilhfiah a, dan bawhchhiatna awm theite titawp nghal turin party mite an hrilh.