BJP, Mizoram state president Vanlalhmuaka’n BJP chuan sakhaw tih bik a nei lo nia sawiin, “Kristian te tan phei chuan an tha hle zawk” a ti.
Tuirial bial inthlan atana campaign mek BJP Mizoram state president chuan he thu hi nimin khan Kawnpui chhim Veng-ah a sawi niin BJP thuchhuahin a tarlang a. Congress hunlaia harsatna tam tak Hindu firfiak te avanga thleng thin chu BJP sorkarna hnuaiah a thleng ngai ta lo niin a sawi.
“Mipui rawngbawl tur chuan mahni sakhuaah kan rinawm tur a ni” tiin Central lama BJP hotu ten an chah thin niin Vanlalhmuaka chuan a sawi a. “Mizoramah erawh kristian politician inti hlir kan nei a, ram leh mipui tana an hnathawh en erawh chuan sakhuaa rinawmlote hnathawh a ni tih a chiang” a ti a. Tuirial nial mipui ten BJP an thlang tling a nih chuan hmasawnna hmel thar an hmu ngei dawn niin a sawi.
Vanlalhmuaka chuan BJP sorkarna state ten kawlphetha tha tak, kawngpui tha tak an nei nia sawiin, BJP-in loneitute an ngaihsak thu a sawi a. Loneitu te hamthatna tam tak avangin India ram hmun hrang hranga loneitu ten hmasawnna tam tak an nei niin a sawi.
Mizorama party hrang hrangte chu lal inchuhin an inbei thin nia sawiin, Vanlalhmuaka chuan BJP erawh chuan ram leh khawtlangin hmasawnna rahbi thar a lo chuankai theihna turin hna an thawk zawk thin niin a sawi a. Sakhaw chungchangah Mizoramah dawta beih an tawk thin nia sawiin, hei pawh hi zawi zawiin a kiam mek niin a sawi bawk.