Huang zauh chungin “all mask campaign” hman ni teh se
Mizoram sorkar chuan mask vuah tura inzirtirna (all mask campaign) a hman mek, vawiin a zo tur chu tun thla ni 31 thleng a pawtsei a, sorkar thuchhuah atanga a lan dan chuan inzirtir leh inhrilhriat kan la ngai nasa hle niin a lang.
Covid hri lengin min luhchilh tak tak hnu hian nunphung a pangngai hlei thei lo a, sorkar pawhin kal ngaihna hre lovin, inkaihhruaina thlengin min thlak kualsak zing viau a nih kha. Tunah lockdown zawnga hma la lo chhoin mask vuah that inzirtirna min kalpui chho leh tan ta a, nasa lehzual zawkin tan la thei se a tha hle mai.
Health minister in all mask campaign pawhsei a nih thu a sawinaah, All Mask Campaign chu Mizoram dinhmun thlira inzirtirna chu ngawrh lehzuala kalpui a tula hriat a nih avangin October 20-a tawp tura tih chu October 31 thlengin pawtsei leh a ni tih a sawi a. “Hetih chhung hian ngawrh lehzuala mask vuah a himzia inzirtir a tul dawn a ni,” a ti a, engtin chiah nge hma an lak dawn la hriat ni lo mah se, tanlak deuh chu a ngai hlein a hriat.
Kan hman mekah hian hriat theih chinah a hawnnaa thu an sawi bakah khawpui chhung hmun remchang laia banner tar vel bak hi hmalakna lian tham a awm lutuk lo niin a hriat a, TV velah hian an pe leh zeuh zeuh thin bawkin a lang! A la beitham hle.
Pawhsei a nih leh takah chuan kawng dang dang hmangin tan la se la, mipui tam zawkin mask vuah tura inzirtirna kalpui mek a ni tih an hriat theih nan ruahmanna kawng dang dang siam zel teh se. Tunah hi chuan all mask campaign kalpui mek a ni tih pawh hre lo chhungkaw tam zawk hi an la ni ngeiin a rinawm. Tanlak zual a tul hle mai.