Serchhip Sub-Hqrs. YMA chuan Myanmar atanga raltlante tanpuina leh chhawmdawlna tur an dawn khawm hrang hrangte chu nimin khan Branch pakuaah an sem chhuak.
Myanmar atanga Mizoram-a raltlante chhawmdawlna atan hian sum leh pai bakah ei tur leh mamawh hrang hrang thahnem tak an dawn khawmte chu sem tur hian Serchhip-a Sub-Hqrs. YMA Office atangin President Kawlthuama chuan a thlah liam a, hetianga Zohnahthlak manganga rawn raltlan te chhawmdawlna tura mi inphal ten thilpek chi hrang hrang an pe chu lawmawm a tih thu a sawi.
Tun tumah hian Serchhip Sub-Hqrs. YMA huamchhunga Branch panga-ah tanpuina hi sem niin N. Vanlaiphai Venglai leh N. Vanlaiphai Damdawi Veng bakah Leng Branch YMA te hnenah Rs 10,000 theuh hlanin, Sailulak leh Lungkawlh Branch te hnenah Rs 5000 ve ve hlan a ni.
Serchhip Sub-Hqrs. YMA area pawnlam-a Branch pali – Cherhlun, New Ngharchhip, Ngharchhip leh Thingsai Branch YMA te hnenah Rs 5,000 theuh hlan a ni a. Heng branch hrang hrangte hnenah hian pawisafai bakah buhfai leh ei tur, thawmhnaw leh mutbu te pawh an mamawh dan azirin pek nghal a ni bawk.
Serchhip Sub-Hqrs. YMA hian raltlan te tanpuina atan hian Central YMA-ah Rs 4,63,410 an lo chhunglut tawh bawk a, nimina tanpuina hlana kalte hi Serchhip Sub-Hqrs. YMA atangin Fin. Secretary Zolianmawia chuan a ho a ni.