Tuirial bial bye-election lo awm tura MNF party candidate K Laldawngliana’n thlan tlin a nih chuan Tuirial bial khawtinah kohhran, NGO leh polical party te telna Development Committee din a nih tur thu a sawi.
MNF party candidate K Laldawngliana chuan he thu hi nimin khan Khamrang khuaah a sawi niin MNF party thuchhuahin a tarlang a. Bial chhung khawtina development committee chuan hmasawnna hna a thawk dawn tih sawiin, “Inthliarna a awm lovang” a ti.
Kuthnathawktute tan marketing system mumal zawk leh kuthnathawktute dinhmun chawikanna tur ruahmanna duan a nih tur thu K Laldawngliana chuan a sawi a. Tuirial bial khawtinah Co-operative movement kalpui a nih tur thu leh bank awmlohnaahte PACS-primary agriculture credit society din an tum thu a sawi.
K Laldawngliana chuan “Zirna lam tihhmasawnna turin Education minister nen ke kan pen ang a, thalaite tan kawng thar kan sial ang a, infiamna leh thildangah hmasawnna rahbi kan tuk ang” a ti a. Thlan tlin a nih chuan Khamrang khuaa Futsal ground siam hna chhunzawm a nih tur thu a sawi bawk.