Greece thliakar eng emaw zat chu lirnghing na takin a sawi a. Mediterranean Sea khawchhak lam, Turkey-a Antalya hmar lam leh Egypt khawpui thenkhat a sawi bawk.
Lirnghing hi Thawhlehni khan Greece thliarkar – Karpathos, Crete, Santorini leh Rhodes-ah te hriat a ni.
“A na khawp mai, second 30 vel awh a ni ang,” tiin Rhodes thliarkara awm, Lindos chuan European Mediterranean Seismological Centre website-ah a tar lang.
Lirnghing hi magnitude 6.0-a na niin lei hnuai km 37.8-a thuk atanga intan niin United States Geological Survey chuan a sawi.
Lirnghing hian Cypriot khawpui, Nicosia; Lebanon khawpui, Beirut; Egypt khawpui, Cairo leh khawpui dang bakah Israel leh Palestinian ram huam chhung te, Turkey chhim lam, Antalya te pawh a sawi phak niin Reuters news agency chuan a tar lang.
Turkey-a chhiatrupna lama thuneitu, Afad chuan a nghin tanna hi an ram vaukam atanga km 155-a hla a nih thu an sawi.
Antalya province-a khualzin mite tlawh thin khua, Kas-ah chuan magnitude 6.0 vela na a la ni phak bawk tih an sawi.
Kas district governor Saban Arda Yazici chuan an huam chhung chinah thi leh hliam leh thil chhia engmah an la hriat loh thu a sawi.
Tun hnai maiah khan lirnghing na takn Crete chu vawi hnih a lo sawi tawh a, mi pakhat thiin in tam tak a tichhia a. Greek seismologist pakhat chuan Thawhlehnia nghing bik hi African fault hran atanga kal a nih thu leh aftershock pawh a thlen a rinawm loh thu a sawi.
Hlauhawm dang hnai rih lo mah se tun hnaia nghing fo hian helai velah seismic che chu a awm ngei tih a hriat thung.
Kar hmasa khan magnitude 6.3-a na lirnghing chu Crete bul tuipuiah thlengin mi pawh an chiai hman hle a. He lirnghing hi Greek khawpui, Athens atanga km 400 vela hla a ni.