Mobile van chu Mizoram hman hawhtir a ni dawn.
Ministry of Science & Technology hnuaia Department Of Biotechnology chuan Mizoram sorkar chu a thlawnin kum khat chhung Mobile RT-PCR Van hmantir a rem ti a, Department of Biotechnology hnuaia mi, Institute of Bioresources and Sustainable Development (IBSD), Imphal kaltlangin Mobile RT-PCR Van hi Mizoram pek a ni dawn a ni.
Kum khat chhunga Mobile RT-PCR Van hman tur chungchangah hian nimin khan Imphal-ah inremna thuthlung ziah fel a ni a, sorkar laipui aiawhin IBSD Director Professor PK Mukherjee leh Mizoram aiawhin Covid chungchanga sorkar thupuangtu, Dr Pachuau Lalmalsawma ten hming an ziak a. Inremna thuthlung an ziah fel hnuah nizan khan Manipur Film Development Corporation Complex Auditorium, Imphal-ah Union Minister of State, Ministry of Science & Technology, Dr Jitendra Singh hmaah MoU hi inhlan a ni.
The Zozam Times zawhna chhangin Dr Pachuau Lalmalsawma chuan, Mobile RT-PCR Van hman chungchangah hian kumin July thla khan sorkar laipui hotute hnenah dilna thlen a lo ni tawh tih a sawi a, chief minister, health minister leh sorkar hotu dangte pawhin Ministry of Science & Technology minister leh secretary te biain Mizoramin Mobile RT-PCR Van a hman vat theih nan ngenna an lo thlen fo tawh tih a sawi.
Dr Pachuau Lalmalsawma chuan, “Mobile RT-PCR Van-a thawk tur leh a tul dang atana senso chu sorkar laipui lam tum vek tur a ni a, sum hi min rawn pek vek an tum,” a ti a, tunah hian RT-PCR Test-na motor hi buatsaih mek niin hun reilo teah Mizoram a lo thlen beisei a nih thu a sawi a, Mizoram bakah India hmarchhak state dangte pawhin Mobile RT-PCR Van hi an lo dil ve tho tih leh hetihlai hian Mizoram chauh pek a nih thu a sawi bawk.