India-in a awp chin Kashmir-a tun hnai ni hnih lek chhunga state dang atanga ei zawnga awm mi pali lai thah an nih avangin hetianga state dang atanga awmte hi an hlauthawng a, tam tak chu an tlanchhiatsan mek.
Heng pawikhawihna hi India dotu hel pawlte tiha ngaih a ni a. Kashmiri helho hian ram indan emaw, Muslim ram, Pakistan-a beh law law emaw sualin kum tam tak India do zawng hian an lo che tawh thin.
Himalaya tlangdunga awm, Kashmir-a state dang atanga inhlawha lutten beih an tawh fo avang hian za chuang chu sipai camp-ah an him nan suan luh an ni a, hmun him zawka insawn pawh an awm teuh bawk.
West Bengal atanga in saknaa inhlawh tura kal pa pakhat chuan a thawhpui dang eng emaw zatte nen police-in hmun him zawkah an sawn thu a sawi.
“Nimin tlai khan police station atangin ka thiante nen kohna kan dawng a, in him zawkah min sawn a ni,” a ti.
He thu sawitu hi Kashmir-a kum 15 zet lo khawsa tawh niin tun hnaia thil thleng chuan amah anga hmun dang atanga lutte a tihlauthawng tak zet tih a sawi.
Police-in himna an pek lohte pawhin Kashmir hi an chhuahsan mek hlawm a. An neih zawng zawng kengin an awmna state lam an pan mek.
Shopian district-a apple huana thawk pakhat chuan a thiante nen Thawhtanni khan an haw tih a sawi.
“Politics thil engmah kan ngaihven lo va, sum thawk chhuak tura kal chauh kan ni a, engvangin nge keini hi min beih ka hre lo,” a ti.
Hetih lai hian tual chhung thuneitute chuan tual chhung mi ni lote hlauhthawnna chu thlamuan tumin an bei a; mahse, tih theih erawh an nei tam lo.
Bihar khawpui, Patna atanga Kashmir pana kum 25 zet puan thuia awm tawh chuan tun anga hlauhna hi a la tawng ngai lo tih a sawi.
“Kei chuan haw ka tum lo va, tual chhung mite kiangah hian himah ka inngai,” a ti thung.
Sorkarin a chhinchhiah dan chuan Kashmir-ah hian kum tin inhlawhna zawngin mi 40,000 vel an lut thin a. Hengte hi mistiri, lungchher, puan thui leh leirawhchan siama inhlawh an ni ber a. Thlasik vanglaiin tam tam chu an haw thin hrim hrim a, cham tlang erawh an awm thin.
Tual chhung thuneitute chuan state dang atanga lutte hi hmun him zawkah dahin venhimna pawh an pe tih an sawi a, “Mi tin himna hi kan mawhphurhna a ni,” an ti.
“Tam tak chu hmun kilkhawr leh district dangah te an khawsa a, an himna erawh kan ngaih pawimawh ber a ni,” an ti bawk.
Pathianni tlai khan Bihar atanga inhlawha kal pahnih, Raja Reshi Dev leh Joginder Resi Dev chu hel pawl ni ngeia hriatten chhim lam, Kulgam district-a Ganjipora khuaah rawng takin an that a. An thianpa pakhatin hliam na tak a tuar bawk.
A hma ni chiah khan Hindu pakhat, Srinagar khawpuia Eidgah venga khawlaia thil zuar chu thah a ni a. Hemi ni vek hian Pulwama district-a Muslim thing mistiri chu thah a ni bawk.
October thla chhung ringawt hian Kashmir-ah civil mi 11 vel thah an ni tawh a, heng zinga panga chu state pawn lam mi an ni a. Tun hnaiah hel an che na hle.
Tun hnaiah Kashmir-ah hian tharum thawhna a thleng nasa hle a, October thla tir atang khan mi 33 vel an thi tawh a, heng zinga 13 chu hel pawla mi niin sipai leh police pakua an thi tawh bawk.